பஸ் படிக்கட்டில் பயணித்த மாணவன், தவறி விழுந்து பலி

அருப்புக்கோட்டை, 

பஸ் படிக்கட்டில் பயணித்த கல்லூரி மாணவன், தவறி விழுந்து பலியான சம்பவம் சோகத்தை ஏற்படுத்தியது.

கல்லூரி மாணவர்

விருதுநகர் மாவட்டம் அருப்புக்கோட்டை அருகே உள்ள வெள்ளையாபுரம் காளியம்மன் கோவில் தெருவை சேர்ந்தவர் சுரேஷ் கண்ணன். இவருடைய மகன் மாதேசுவரன்(வயது 19).

இவர் விருதுநகரில் உள்ள ஒரு தனியார் கல்லூரியில் 2-ம் ஆண்டு பி.எஸ்சி. படித்து வந்தார். இந்தநிலையில் இவர் நேற்று கல்லூரி செல்வதற்காக அருப்புக்கோட்டையில் இருந்து அரசு டவுன் பஸ்சில் சென்றுள்ளார். பஸ்சில் கூட்டம் அதிகமாக இருந்ததால் படியில் தொங்கியவாறு மாதேசுவரன் பயணம் செய்ததாக கூறப்படுகிறது.

தவறி விழுந்து பலி

இந்த பஸ் பாலவனத்தம் அருகே சென்றபோது, படியில் இருந்து மாதேசுவரன் திடீரென தவறி கீழே விழுந்தார். இதில் படுகாயம் அடைந்த அவர், சம்பவ இடத்திலேயே பலியானார்.

இந்த சம்பவம் குறித்து தகவல் அறிந்து விரைந்து வந்த தாலுகா போலீசார், மாதேசுவரனின் உடலை மீட்டு பரிசோதனைக்காக அருப்புக்கோட்டை அரசு மருத்துவமனைக்கு கொண்டு சென்றனர். இதுகுறித்து போலீசார் தொடர்ந்து விசாரணை நடத்தி வருகின்றனர்.

பஸ்சில் இருந்து கீழே விழுந்து கல்லூரி மாணவன் உயிரிழந்த சம்பவம் சோகத்தை ஏற்படுத்தியது.