அரசு பஸ் மோதி மாணவன் பலி; சாலையை கடக்க முயன்றபோது பரிதாபம்

கொடைரோடு அருகே உள்ள சக்கையநாயக்கனூரை சேர்ந்தவர் அருள் ஆரோக்கியம். அவருடைய மகன் அருள்கவின் (வயது 7). இவன், அப்பகுதியில் உள்ள பள்ளியில் 1-ம் வகுப்பு படித்து வந்தான். இன்று காலை இவன், தனது வீட்டின் அருகே உள்ள கொடைரோடு-செம்பட்டி சாலையை கடக்க முயன்றான். அப்போது மதுரையில் இருந்து கோவை நோக்கி சென்ற அரசு பஸ், அருள்கவின் மீது மோதியது.

இதில் படுகாயம் அடைந்த சிறுவனை அக்கம்பக்கத்தினர் மீட்டு சிகிச்சைக்காக நிலக்கோட்டை அரசு மருத்துவமனைக்கு கொண்டு சென்றனர். ஆனால் வழியிலேயே அருள்கவின் பரிதாபமாக இறந்தான். இதுகுறித்து அம்மையநாயக்கனூர் போலீஸ் இன்ஸ்பெக்டர் சண்முகலட்சுமி வழக்குப்பதிவு செய்து விசாரணை நடத்தி வருகிறார்.