தீபாவளிக்கு பொருட்கள் வாங்க சென்ற தொழிலாளி மோட்டார் சைக்கிள் மோதி சாவு

பெரம்பலூர் டவுன், துறையூர் சாலையில் உள்ள எம்.ஜி.ஆர். நகரை சேர்ந்தவர் முத்துராமன்(வயது 55). கூலித்தொழிலாளி. இவருக்கு தனலட்சுமி(43) என்ற மனைவியும், தினேஷ் (23) என்ற மகனும், ஹேமலதா (25) என்ற மகளும் உள்ளனர். சம்பவத்தன்று முத்துராமன், தீபாவளிக்கு பொருட்கள் வாங்குவதற்காக வெங்கடேசபுரம் பகுதிக்கு சென்றார்.

அப்போது துறைமங்கலம் அவ்வையார் நகரை சேர்ந்த அகிலன்(22), பெரம்பலூர் காமராஜர் வளைவிற்கு தனது நண்பர் கார்த்தியுடன் மோட்டார் சைக்கிளில் சென்றுள்ளார். முத்துராமன் சாலையை கடக்க முயன்றபோது, அகிலன் ஓட்டி வந்த மோட்டார் சைக்கிள் அவர் மீது மோதியது.

இதில் தலையில் பலத்த காயமடைந்த முத்துராமனை அருகில் இருந்தவர்கள் மீட்டு சிகிச்சைக்காக பெரம்பலூர் அரசு மருத்துவமனைக்கு 108 ஆம்புலன்ஸ் மூலம் கொண்டு சென்று சேர்த்தனர். பின்னர் மேல்சிகிச்சைக்காக திருச்சி அரசு மருத்துவமனைக்கு கொண்டு செல்லப்பட்ட அவர், அங்கு தீவிர சிகிச்சை அளித்தும் பலனின்றி இறந்தார். இந்த சம்பவம் குறித்து பெரம்பலூர் போலீசார் வழக்குப்பதிவு செய்து விசாரணை நடத்தி வருகின்றனர்.