மணப்பெண்ணின் பேச்சை கேட்ட மகனின் திருமணத்தை நிறுத்திய தொழில் அதிபர்

சூலூர்

முகச்சவரம் செய்யாமல் தாடியை டிரிம் செய்யுமாறு கூறிய மணப்பெண்ணின் பேச்சை கேட்ட மகனின் திருமணத்தை நிறுத்துவதாக சமூகவலைத்தளத்தில் தொழில் அதிபர் பதிவிட்டதால் உறவினர்கள் அதிர்ச்சி அடைந்தனர்.

தொழில் அதிபர் மகன்

கோவையை அடுத்த சூலூர் பகுதியை சேர்ந்த தொழில் அதிபர் ஒருவர் தனது மகனுக்கு பெண் பார்த்து வந்தார். அவர் கடந்த 3 மாதங்களுக்கு முன்பு, தனது மகனுக்கு பெரிய இடத்தில் பெண் பார்த்தார். அதன்பிறகு இருவீட்டாரும் பேசி சம்பந்தம் செய்து திருமண ஏற்பாடுகளில் தீவிரமாக ஈடுபட்டு வந்தனர். நேற்றுமுன்தினம் திருமணம் நடைபெற இருந்தது.

இதற்கிடையே புதுமணப்பெண்ணும், புதுமாப்பிள்ளையும் செல்போனில் அடிக்கடி பல்வேறு விஷயங்கள் குறித்து பேசி மகிழ்ந்தனர். இதற்கிடையே தொழில் அதிபர் தனது மகனிடம், திருமணம் நடைபெற இருப்பதால் முகத்தில் தாடியை சவரம் செய்தால் நன்றாக இருக்கும் என்று கூறி உள்ளார்.

மணமகள் அறிவுரை

உடனே மணமகன், மணமகளை செல்போனில் தொடர்பு கொண்டு முகச்சவரம் செய்ய சலூனுக்கு செல்ல உள்ளதாக கூறி உள்ளார். அதை கேட்ட மணமகள், உங்களுக்கு தாடி தான் அழகாக உள்ளது. எனவே முகச்சவரம் செய்ய வேண்டாம். லேசாக டிரிம் செய்து கொள்ளுங்கள் என்று கூறி உள்ளார்.

அதை ஏற்றுக் கொண்ட மணமகன், தனது தந்தை கூறியபடி முகச்சவரம் செய்யாமல், மனைவியாக வர உள்ள மணப்பெண் கூறியபடி சலூனுக்கு சென்று தாடியை லேசாக டிரிம் மட்டும் செய்து விட்டு வீட்டிற்கு சென்று உள்ளார்.

அதை பார்த்த தொழில் அதிபர் அதிர்ச்சி அடைந்து, தனது மகனிடம் ஏன் நான் கூறியபடி முகச்சவரம் செய்ய வில்லை என்று கேட்டு உள்ளார். அவருக்கு உரிய பதில் அளிக்காமல் புதுமாப்பிள்ளையான மகன் தடுமாறினார். ஆனாலும் தொழில் அதிபர் விடாமல் கேட்டதால் ஒரு கட்டத்தில், வருங்கால மனைவி கூறியபடி கேட்டு தாடியை டிரிம் செய்ததாக கூறினார்.

தந்தை பேச்சை மீறினார்

மகன் சொன்னதை கேட்டு ஆத்திரத்தின் உச்சிக்கே சென்ற தொழில் அதிபர், பெற்று வளர்த்து ஆளாக்கிய என் பேச்சை கேட்காமல் நாளைக்கு வரப்போகும் மனைவியின் பேச்சை கேட்டு நடக்கிறாய். எனது வார்த்தைகளை மதிக்க தவறி விட்டாய் என்று கூறி கண்டித்து உள்ளார்.

இதனால் நிலைகுலைந்து போன மகன், தனது தந்தையை சமாதானப்படுத்த எவ்வளவோ முயற்சி செய்தார். ஆனால் அதை ஏற்க தொழில் அதிபரின் மனம் மறுத்து விட்டது. மேலும் ஆவேசம் அடைந்த தொழில் அதிபர், தனது மகனை வீட்டை விட்டு வெளியே தள்ளி கதவை பூட்டி விட்டார். இதனால் புதுமாப்பிள்ளை இரவு முழுவதும் வீட்டின் வாசலில் படுத்துக் கொள்ள வேண்டிய நிலை ஏற்பட்டது.

திருமணம் நிறுத்தம்

அப்போது மணமகன் தனக்கு நேர்ந்த நிலை பற்றி மணமகளிடம் கூறி உள்ளார். அதை கேட்டு அதிர்ச்சி அடைந்த புதுப்பெண், நிலைமையை சரி செய்ய முயன்றார். இதற்காக அவர் தனது தந்தையிடம் நடந்ததை கூறி, மணமகனின் தந்தையான தொழில் அதிபரிடம் பேசி சமாதானம் செய்யுமாறு கூறி உள்ளார்.

மகளின் நிலையை நினைத்து கலங்கிய தந்தை, மணமகனின் தந்தையான தொழில் அதிபரை நேரில் சந்தித்து சமாதான பேச்சுவார்த்தை நடத்தினார். ஆனால் அவர் கூறிய எந்த ஒரு சமாதானத்தையும் ஏற்க தொழில் அதிபர் மறுத்து விட்டதாக தெரிகிறது. நிலைமை கைமீறிப் போனதால் மணமகளின் தந்தை அங்கிருந்து சோகத்துடன் வெளியேறி உள்ளார்.

உறவினர்கள் சோகம்

இதற்கிடையே மணமகனின் தந்தையான தொழில் அதிபர் சமூக வலைத்தளத்தில் ஒரு பதிவை வெளியிட்டார். அதில், எனது மகனின் திருமணம் நின்று விட்டது. எனவே திருமண மண்டபத் துக்கு யாரும் வர வேண்டாம் என்று குறிப்பிட்டு இருந்தார். அதை பார்த்த மணமகள் வீட்டினர் அதிர்ச்சியில் உறைந்து போனார்கள்.

நேற்றுமுன்தினம் நடக்க இருந்த திருமணம் நின்று போனதால் மகிழ்ச்சியுடன் திருமண மண்டபத்துக்கு வந்த உறவினர்கள் சோகத்துடன் திரும்பி சென்றனர்.