இரு தரப்பினர் மோதல் 5 பேர் கைது

சங்கராபுரம்

சங்கராபுரம் அருகே உள்ள சிவபுரம் கிராமத்தை சேர்ந்தவர் சிங்காரவேல் மகன் சங்கர்(வயது 30). இவருக்கும் மூக்கனூர் கிராமத்தை சேர்ந்த செல்வராஜ் மகன் செங்கோட்டையன்(25) என்பவருக்கும் இடையே கடந்த சில நாட்களுக்கு முன்பு இருசக்கர வாகனங்கள் மோதிக்கொண்ட விபத்தில் முன் விரோதம் இருந்து வந்தது.

இந்த நிலையில் நேற்று முன்தினம் தேவபாண்டலத்தில் இரு தரப்பினருக்கும் இடையே திடீர் மோதல் ஏற்பட்டது. இதில் இரு தரப்பினரும் ஒருவரை ஒருவர் தாக்கிக்கொண்டனர். இதுபற்றிய தகவல் அறிந்து மாவட்ட போலீஸ் சூப்பிரண்டு மோகன்ராஜ் தலைமையில் போலீசார் சம்பவ இடத்துக்கு விரைந்து சென்றனர். போலீசாரை கண்டதும் இரு தரப்பினரும் அங்கிருந்து தப்பி ஓடிவிட்டனர்.

பின்னர் இது குறித்து இரு தரப்பினரும் சங்கராபுரம் போலீஸ் நிலையத்தில் ஒருவர் மீது ஒருவர் புகார் கொடுத்தனர். இதில் சங்கர் என்பவர் கொடுத்த புகாரின் பேரில் மூக்கனூர் கிராமத்தை சேர்ந்த செங்கோட்டையன், தனசேகரன், செந்தூரப்பாண்டியன், மகாகிருஷ்ணன், பாண்டித்துரை ஆகிய 5 பேர் மீதும் சப்-இன்ஸ்பெக்டர் நரசிம்மஜோதி வழக்குப்பதிவு செய்து செங்கோட்டையன், தனசேகரன்(22), செந்தூரப்பாண்டியன்(21) ஆகிய 3 பேரை கைது செய்தனர். இதேபோல் செங்கோட்டையன் கொடுத்த புகாரின் பேரில் சிவபுரம் கிராமத்தை சேர்ந்த சங்கர், முருகன்(29) ஆகியோர் மீது போலீசார் வழக்குப்பதிவு செய்து அவர்களையும் கைது செய்தனர்.

இரு தரப்பினரிடையே நடந்த மோதலை தொடர்ந்து சிவபுரம், மூக்கனூா் கிராமங்களில் பதற்றம் நிலவி வருகிறது. இதையடுத்து அங்கு பலத்த போலீஸ் பாதுகாப்பு போடப்பட்டுள்ளது.