செம்பட்டியில் விநாயகர் சதுர்த்திக்கு தயாரான 400 சிலைகள்

திண்டுக்கல் மேற்கு மாவட்ட இந்து முன்னணி சார்பில் கொடைக்கானல், வத்தலக்குண்டு, நிலக்கோட்டை, ஆத்தூர், சின்னாளப்பட்டி, அய்யம்பாளையம், பட்டிவீரன்பட்டி உள்பட பல்வேறு இடங்களில் விநாயகர் சதுர்த்தி விழாவை சிறப்பாக கொண்டாட முடிவு செய்யப்பட்டுள்ளது. இதற்காக செம்பட்டி பகுதியில் விநாயகர் சிலைகள் தயார் செய்யப்பட்டு வந்தது. அதன்படி, 3 அடி, 5 அடி மற்றும் 7 அடி உயரத்தில் பல்வேறு கோணங்களில் 400 விநாயகர் சிலைகள் தயார் செய்யப்பட்டது. பின்னர் அதற்கு வர்ணம் பூசி அழகுபடுத்தப்பட்டது.

இதற்கிடையே தயாரான விநாயகர் சிலைகளை கொடைக்கானல், வத்தலக்குண்டு உள்பட பல்வேறு இடங்களுக்கு நேற்று லாரி, மினி வேன் மூலம் அனுப்பி வைக்கப்பட்டு வருகிறது. இதற்கான நிகழ்ச்சியில் திண்டுக்கல் மேற்கு மாவட்ட இந்து முன்னணி பொதுச் செயலாளர் ஜெயக்குமார், மாவட்ட செயலாளர் அண்ணாதுரை உள்பட ஏராளமானோர் கலந்துகொண்டனர்.

தற்போது அனுப்பி வைக்கப்பட்டுள்ள விநாயகர் சிலைகள் வருகிற 31-ந்தேதி விநாயகர் சதுர்த்தி அன்று அந்தந்த பகுதிகளில் பிரதிஷ்டை செய்யப்பட்டு, வழிபாடு நடைபெற உள்ளது. பின்னர் மறுநாள் முக்கிய வீதிகள் வழியாக, மேளதாளம், வாணவேடிக்கையுடன் விநாயகர் சிலைகள் ஊர்வலமாக எடுத்து செல்லப்பட்டு நீர்நிலைகளில் கரைக்கப்பட உள்ளது குறிப்பிடத்தக்கது.