கோட்டார் அரசு ஆயுர்வேத ஆஸ்பத்திரிக்கு 300 நாற்காலிகள்;விஜய்வசந்த் எம்.பி. வழங்கினார்

நாகர்கோவில், 

கோட்டார் அரசு ஆயுர்வேத மருத்துவக்கல்லூரி ஆஸ்பத்திரிக்கு 300 நாற்காலிகளை விஜய்வசந்த் எம்.பி. வழங்கினார்.

ஆயுர்வேத ஆஸ்பத்திரி

நாகர்கோவில் கோட்டாரில் உள்ள அரசு ஆயுர்வேத மருத்துவக்கல்லூரி ஆஸ்பத்திரிக்கு விஜய்வசந்த் எம்.பி. 300 நாற்காலிகளை வழங்கி இருக்கிறார். இந்த நாற்காலிகளை ஆஸ்பத்திரியில் ஒப்படைக்கும் நிகழ்ச்சி நேற்று நடந்தது. நிகழ்ச்சிக்கு கல்லூரி டீன் டாக்டர் கிளாரன்ஸ் டெவி தலைமை தாங்கினார். விஜய்வசந்த் எம்.பி. சிறப்பு விருந்தினராக கலந்து கொண்டு நாற்காலிகளை கல்லூரி டீன் கிளாரன்ஸ் டெவியிடம் வழங்கினார்.

பின்னர் அவர் பேசும் போது, "கொரோனா காலத்தில் ஆயுர்வேத கல்லூாியில் சிறப்பான சிகிச்சை அளிக்கப்பட்டது. ஏராளமான நோயாளிகள் ஆஸ்பத்திரியில் அனுமதிக்கப்பட்டனர். ஆயுர்வேத சிகிச்சைகள் குறித்து கிராமப்புற மக்களிடமும் விழிப்புணர்வு ஏற்படுத்த வேண்டும்" என்றார்.

ராகுல்காந்தி வருகை

அதைத் தொடர்ந்து அவர் நிருபர்களிடம் கூறியதாவது:- நாகர்கோவில் கோட்டாரில் உள்ள அரசு ஆயுர்வேத மருத்துவக்கல்லூரி ஆஸ்பத்திரிக்கு பல்வேறு மாவட்டங்களில் இருந்தும் மாணவ-மாணவிகள் வந்து படிக்கிறார்கள். மேலும் இங்கு சிகிச்சைக்கு வரும் நோயாளிகளின் எண்ணிக்கை நாளுக்கு நாள் அதிகரித்து வருகிறது. இந்த நிலையில் ஆஸ்பத்திரிக்கு நாற்காலிகள் வேண்டும் என்று கோரிக்கை வைத்திருந்தனர். அதன்படி தற்போது 300 நாற்காலிகள் வழங்கப்பட்டிருக்கிறது. மேலும் புறநோயாளிகளுக்கு தேவையான உள்கட்டமைப்பு வசதிகளை மேம்படுத்த வேண்டும் என்றும் கோரிக்கை வைக்கப்பட்டுள்ளது. அந்த கோரிக்கையும் நிறைவேற்றி தரப்படும். வருகிற 7-ந் தேதி ராகுல்காந்தி கன்னியாகுமரியில் இருந்து காஷ்மீருக்கு நடைபயணத்தை தொடங்குகிறார். இதற்கான ஏற்பாடுகள் அனைத்தும் மும்முரமாக நடைபெற்று வருகின்றன. கூடிய விரைவில் இது தொடர்பான முழு அறிவிப்பு வெளியிடப்படும்.

இவ்வாறு அவர் கூறினார்.

முன்னதாக நாகர்கோவில் கோட்டார் போக்குவரத்து ஒழுங்குபிரிவு போலீசாருக்கு கண்காணிப்பு கேமரா பயன்பாட்டுக்காக எல்.இ.டி. டி.வி.யை விஜய்வசந்த் எம்.பி. வழங்கினார்.

நிகழ்ச்சியில் நாகர்கோவில் மாநகர் மாவட்ட தலைவர் நவீன்குமார், மாநில பொதுக்குழு உறுப்பினர் ரெத்தினகுமார், கண்ணனூர் ஊராட்சி காங்கிரஸ் தலைவர் ஜோஸ் உள்பட பலர் கலந்து கொண்டனர்.