மோட்டார்சைக்கிள் திருடிய 3 பேர் கைது

கீழ்வேளூர் அருகே மோட்டார்சைக்கிள் திருடிய 3 பேரை போலீசார் கைது செய்தனர்.

மோட்டார்சைக்கிள் திருட்டு

புதுக்கோட்டை மாவட்டம் ஆலங்குடி அருகே உள்ள தெட்சிணாபுரம் பகுதியை சேர்ந்தவர் முருகேஷ் மகன் பிரவீன் (வயது23). இவருடைய நண்பர் அதே பகுதியை சேர்ந்த விக்னேஷ் (24). இவர்கள் இருவரும் கடந்த 30-ந் தேதி புதுக்கோட்டையில் இருந்து மோட்டார் சைக்கிளில் நாகை மாவட்டம் வேளாங்கண்ணி மாதா பேராலயத்திற்கு வந்து கொண்டிருந்தனர். கீழ்வேளூர் அருகே வந்த போது கீழ்வேளூர்- ஓர்குடி சாலையில் உள்ள டாஸ்மாக் கடைக்கு சென்றுள்ளனர். அப்போது பூலாங்குடி பஸ் நிறுத்தம் அருகே வந்தபோது மோட்டார் சைக்கிளை வழிமறித்த 4 மர்மநபர்கள் கத்தியை காட்டி மிரட்டி 2 பேரிடம் இருந்த ரூ.10 ஆயிரம், வெள்ளி சங்கிலி மற்றும் மோட்டார் சைக்கிள் ஆகியவற்றை திருடி சென்றுவிட்டனர்.

இதுகுறித்த புகாரின் பேரில் கீழ்வேளூர் போலீசார் வழக்குப்பதிவு செய்து மர்மநபர்களை வலைவீசி தேடி வந்தனர்.

3 பேர் கைது

இந்தநிலையில் நேற்று கீழ்வேளூர் அருகே உள்ள கானூர் சோதனை சாவடியில் கீழ்வேளூர் போலீசார் வாகன சோதனையில் ஈடுபட்டனர். அப்போது அந்த வழியாக ஒரு மோட்டார் சைக்கிளில் வந்த 3 பேரை பிடித்து விசாரணை நடத்தினர்.

விசாரணையில் அவர்கள் நாகை செல்லூர் சுனாமி குடியிருப்பை சேர்ந்த ஜெகநாதன் மகன் அஜித் ( 23), அகரகடம்பனூர் ஊராட்சி கோவில்கடம்பனூர் பகுதியை சேர்ந்த ராமசாமி மகன் வினோத் (24), கோவில்கடம்பனூர் ஸ்ரீகண்டிநத்தம் பகுதியை சேர்ந்த ஜோதி பாசு மோகன் சுதீஷ் (19) ஆகியோர் என்பதும், புதுக்கோட்டையை சேர்ந்த பிரவீன், விக்னேஷ் ஆகியோர் ஒட்டி வந்த மோட்டார் சைக்கிளை கத்தியை காட்டி மிரட்டி திருடியதும் தெரியவந்தது.

இதுகுறித்து போலீசார் வழக்குப்பதிவு செய்து 3 பேரையும் கைது செய்து அவர்களிடம் இருந்து மோட்டார் சைக்கிளை பறிமுதல் செய்தனர். இது தொடர்பாக மேலும் ஒருவரை போலீசார் தேடி வருகின்றனர்.