அசாம் மாநிலத்தை சேர்ந்த 3 பேர் கைது

பல்லடம்

பல்லடம் அருகே வீட்டில் தனியாக இருந்த பெண்ணைகூட்டுப்பாலியல் தொந்தரவு செய்த அசாம் மாநிலத்தை சேர்ந்த 3 பேரை போலீசார் கைது செய்தனர்.

இது குறித்து போலீஸ் தரப்பில் கூறப்படுவதாவது:-

கூட்டுப்பாலியல் தொந்தரவு

பல்லடம் அருகே உள்ள எம்.ஊத்துக்குளி பகுதியில் தனியார் தொழிற்சாலை உள்ளது. இங்கு அசாம் மாநிலத்தைச் சேர்ந்த தம்பதி வேலை செய்து வருகின்றனர். இந்த நிலையில் சம்பவத்தன்று இரவு பெண்ணின் கணவர் வேலைக்கு சென்றுவிட்டார். இதனால் அவரது மனைவி மட்டும் தனியே வீட்டில் தூங்கிக் கொண்டிருந்தார்.

அப்போது அதே நிறுவனத்தில் வேலைபார்க்கும் வடமாநில வாலிபர்கள் 3 பேர் வீட்டிற்குள் புகுந்து தனியே இருந்த அந்தப் பெண்ணுக்கு பாலியல் தொந்தரவு கொடுத்ததாக கூறப்படுகிறது. இதனால் அதிர்ச்சி அடைந்த அவர் அலறித் துடித்தார். இதையடுத்து அவர்கள் 3 பேரும் அங்கிருந்து தப்பி ஓடி விட்டனர். பெண்ணின் அலறல் சத்தம் கேட்டு தொழிற்சாலையில் இருந்து வந்த தொழிலாளர்கள் அந்தப் பெண்ணை மீட்டு சிகிச்சைக்காக பல்லடம் அரசு மருத்துவமனையில் சேர்த்தனர். அங்கு அவருக்கு சிகிச்சை அளிக்கப்பட்டு வருகிறது.

3 பேர் கைது

இந்த சம்பவம் தொடர்பாக பல்லடம் மகளிர் போலீஸ் இன்ஸ்பெக்டர் பர்வின்பானு தலைமையிலான போலீசார் வழக்குப்பதிவு செய்து பெண்ணை கூட்டுப்பாலியல் தொந்தரவு செய்த அசாம் மாநிலத்தை சேர்ந்த இப்ராஹிம் அலி(வயது 27), அமருள் இஸ்லாம் (22), அனீப் அலி( 19) ஆகிய 3 பேரை கைது செய்தனர். பின்னர் அவர்கள பல்லடம் நீதிமன்றத்தில் ஆஜர்படுத்தி சிறையில் அடைத்தனர்.