250 லிட்டர் கள்ளச்சாராய ஊறல் பறிமுதல்; பெண்கள் உள்பட 5 பேர் கைது

அன்னவாசல் அருகே உள்ள குடுமியான்மலையை அடுத்த சீகம்பட்டி பகுதிகளில் சிலர் குளத்துக்கரை மற்றும் குளத்துமடை ஓரங்களில் சாராய ஊறல் போட்டுள்ளதாக புதுக்கோட்டை நகர மதுவிலக்கு அமலாக்கப்பிரிவு போலீசாருக்கு ரகசிய தகவல் கிடைத்தது. இதையடுத்து புதுக்கோட்டை மாவட்ட சிறப்புபடை சப்-இன்ஸ்பெக்டர் பாலமுருகன் தலைமையிலான போலீசார் சீகம்பட்டி பகுதியில் தீவிர சோதனையில் ஈடுபட்டனர். அப்போது சீகம்பட்டி குளத்துக்கரை மடைபகுதி அருகிலும், கரையிலும் 7 பிளாஸ்டிக் பேரல்களில் 250 லிட்டர் கள்ளச்சாராய ஊறல் மற்றும் 8 லிட்டர் எரி சாராயம் ஆகியவற்றை கண்டு பிடித்தனர். பின்னர் கள்ளச்சாராய ஊறல் போட்ட சீகம்பட்டியை சேர்ந்த கார்த்திக் (வயது 26), பெருமாள் (23), சரத்குமார் (20), உப்புபாறையை சேர்ந்த கண்ணகி (38), மகேஷ்வரி (34) ஆகிய 5 பேரை கைது செய்தனர். மேலும் பறிமுதல் செய்த 250 லிட்டர் கள்ளச்சாராயம், 8 லிட்டர் எரி சாராயம் ஆகியவை புதுக்கோட்டை நகர மது விலக்கு அமலாக்கத்துறையில் ஒப்படைத்தனர்.