தமிழகத்தில் 58 பேருக்கு கொரோனா; பெண்கள் பாதிப்பு உயர்ந்தது

சென்னை,

தமிழகத்தில் வழக்கத்தை விட நேற்று பெண்கள் பாதிப்பு உயர்ந்துள்ளது. அந்தவகையில் நேற்று முன்தினம் (புதன்கிழமை) 13 பெண்கள் மட்டுமே பாதிக்கப்பட்டிருந்தனர். இந்தநிலையில் நேற்று (வியாழக்கிழமை) தமிழகத்தில் 33 பெண்கள் கொரோனா தாக்கத்துக்கு ஆளாகி உள்ளனர். இது குறித்து மருத்துவம் மற்றும் மக்கள் நல்வாழ்வுத்துறை வெளியிட்டுள்ள செய்திக்குறிப்பில் கூறப்பட்டிருப்பதாவது:-

நேற்று புதிதாக 16 ஆயிரத்து 559 பேருக்கு கொரோனா பரிசோதனை செய்யப்பட்டது. இதில் பெண்கள் பாதிப்பு உயர்ந்து 33 பேரும், ஆண்கள் 25 பேரும் உள்பட 58 பேருக்கு புதிதாக கொரோனா தொற்று உறுதி செய்யப்பட்டு உள்ளது.

அதிகபட்சமாக சென்னையில் 28 பேரும், செங்கல்பட்டில் 20 பேரும் உள்பட 9 மாவட்டங்களில் மட்டும் தொற்று பாதிப்பு பதிவாகி உள்ளது. 29 மாவட்டங்களில் பாதிப்பு இல்லை.

12 வயதுக்கு உட்பட்ட குழந்தைகள் 5 பேர், 60 வயதுக்கு மேற்பட்ட முதியவர்கள் 6 பேர் நேற்று கொரோனா தொற்றால் பாதிக்கப்பட்டு உள்ளனர். மேலும் 11 மாவட்டங்கள் கொரோனாவே இல்லாத மாவட்டங்களாக உருவாகி உள்ளது.

இந்த மாவட்டங்களில் புதிதாக யாருக்கும் கொரோனா தொற்றும் இல்லை, சிகிச்சையிலும் யாரும் இல்லை. இதுவரை 34 லட்சத்து 54 ஆயிரத்து 153 பேருக்கு கொரோனா தொற்று உறுதி செய்யப்பட்டு உள்ளது.

சென்னையில் 300 பேர் சிகிச்சை

தமிழகத்தில் தொடர்ந்து 49-வது நாளாக நேற்று கொரோனாவால் ஒருவர் கூட உயிரிழக்கவில்லை. இதுவரை 38 ஆயிரத்து 25 பேர் கொரோனா தொற்றால் உயிரிழந்து உள்ளனர்.

மேலும் நேற்றைய நிலவரப்படி 466 பேர் கொரோனா நோய்க்கு சிகிச்சை பெற்று வருகின்றனர். அதிகபட்சமாக சென்னையில் 300 பேரும், செங்கல்பட்டில் 79 பேரும் சிகிச்சையில் உள்ளனர். தமிழகத்தில் 21 பேர் மட்டுமே ஆஸ்பத்திரி சிகிச்சையில் அனுமதிக்கப்பட்டு உள்ளனர்.

59 பேர் கொரோனா நோயில் இருந்து குணமடைந்து நேற்று ‘டிஸ்சார்ஜ்’ செய்யப்பட்டு உள்ளனர். இதுவரை தமிழகத்தில் 34 லட்சத்து 15 ஆயிரத்து 662 பேர் பூரணமாக குணமடைந்து வீடு திரும்பி உள்ளனர்.

இவ்வாறு அதில் கூறப்பட்டு உள்ளது.