சென்னை புத்தக கண்காட்சி இன்றுடன் நிறைவு...

சென்னை,

தென்னிந்திய புத்தக விற்பனையாளர் மற்றும் பதிப்பாளர் (பபாசி) சங்கத்தின் சார்பில், 45-வது சென்னை புத்தக கண்காட்சி கடந்த மாதம் 16-ந் தேதி நந்தனம் ஒய்.எம்.சி.ஏ. மைதானத்தில் தொடங்கியது. இந்த கண்காட்சியை முதல்-அமைச்சர் மு.க.ஸ்டாலின் தொடங்கிவைத்தார். மொத்தம் 800 அரங்குகளில், 10 லட்சம் தலைப்புகளிலான புத்தகங்கள் காட்சிப்படுத்தப்பட்டிருந்தன. 

கடந்த 18 நாட்களாக காலை 11 மணி முதல் இரவு 8 மணி வரை புத்தக கண்காட்சி நடைபெற்றது. ஆசியாவிலேயே மிகப்பெரிய புத்தக கண்காட்சி என்ற சிறப்பை பெற்ற சென்னை புத்தக கண்காட்சி இன்றுடன் நிறைவு பெறுகிறது.

இதுவரை, 12 லட்சத்துக்கும் அதிகமான வாசகர்கள் புத்தக கண்காட்சிக்கு வந்து சென்றுள்ளனர். இன்று மாலை நிறைவு விழா நடைபெறுகிறது. அதில், 25 ஆண்டுகள் பதிப்பகத் துறையில் பணியாற்றியவர்களுக்கும், சென்னை புத்தக கண்காட்சி நடைபெற உறுதுணையாக இருந்தவர்களுக்கும் பாராட்டு தெரிவிக்கப்பட இருக்கிறது.

இந்த நிகழ்வில், சென்னை ஐகோர்ட்டு நீதிபதி அரங்க மகாதேவன் பங்கேற்க இருக்கிறார்.