லஞ்சம் வாங்கிய கிராம நிர்வாக அதிகாரிக்கு 2 ஆண்டுகள் சிறை

கரூர் அருகே உள்ள வெடிக்காரன்பட்டியை சேர்ந்தவர் முருகேசன். இவர் தனக்கு சொந்தமான நிலத்தை அளந்து சரி செய்து தர வலியுறுத்தி கடந்த 2009-ம் ஆண்டு மார்ச் மாதம் புலியூர் பகுதியை சேர்ந்த கிராம நிர்வாக அதிகாரி சீனிவாசனிடம் கூறியுள்ளார்.

இதற்கு அவர் ரூ.5 ஆயிரம் லஞ்சம் கேட்டதாக தெரிகிறது. ஆனால் லஞ்சம் கொடுக்க மனமில்லாத முருகேசன் இதுகுறித்து திருச்சி லஞ்ச ஒழிப்பு போலீசாருக்கு தகவல் கொடுத்துள்ளார்.

இதனைதொடர்ந்து லஞ்ச ஒழிப்பு போலீசார் ரசாயனம் தடவிய ரூபாய் நோட்டுகளை சீனிவாசனிடம் கொடுக்குமாறு முருகேசனிடம் கூறினர். அதன்பேரில் அவர் ரூபாய் நோட்டுகளை கொடுத்தபோது சீனிவாசனை கையும் களவுமாக லஞ்ச ஒழிப்பு போலீசார் பிடித்தனர். மேலும், அவர் மீது 2 பிரிவுகளில் வழக்குப்பதிவு செய்யப்பட்டது.

இந்த வழக்கின் விசாரணை கரூர் நீதிமன்றத்தில் நடைபெற்று வந்தது. இதற்கான தீர்ப்பு நேற்று தலைமை குற்றவியல் நடுவர் நீதிமன்ற நீதிபதி ராஜலிங்கம் வழங்கினார். அதில் ஒவ்வொரு பிரிவிற்கும் 2 ஆண்டுகள் சிறை தண்டனை என 4 ஆண்டுகள் சிறை தண்டனையும், ஒவ்வொரு பிரிவிற்கும் ரூ.20 ஆயிரம் அபராதம் என மொத்தம் ரூ.40 ஆயிரம் அபராதம் விதித்தார். மேலும், இந்த தண்டனையை ஏக காலத்தில் அனுபவிக்க வேண்டும் என உத்தரவிட்டார்.

மேலும், அபராதத்தை கட்டத்தவறினால் ஒவ்வொரு பிரிவிற்கும் 6 மாதம் சிறை தண்டனை என ஓராண்டு சிறை தண்டனை அனுபவிக்க வேண்டும் என நீதிபதி தனது தீர்ப்பில் கூறினார்.