அறிக்கைகளால் மக்களை குழப்புவது, அவதூறாக கருத்து வெளியிடுவது கண்டனத்திற்குரியது - அமைச்சர் ராஜேந்திர பாலாஜி

சென்னை

திமுக தலைவர் மு.க.ஸ்டாலின் வெளியிட்டு உள்ள அறிக்கையில்  கொரோனா கொடிய நோய்த் தொற்றைத் தடுப்பதில் படுதோல்வியடைந்து, ‘கொரோனா எப்போது ஒழியும் என்பது கடவுளுக்கே வெளிச்சம்’ என்று இயலாமையால் கைவிரித்து நிற்கும் முதல்-அமைச்சர் எடப்பாடி பழனிசாமி  தமிழக மக்களை கொரோனா நோய்த் தொற்றில் இருந்து பாதுகாத்திட முன்வரவேண்டும் என கூறி இருந்தார்.

இதற்கு அமைச்சர் ராஜேந்திர பாலாஜி பதில் அளித்து கூறியதாவது;-

இன்னும் மருந்து கண்டுபிடிக்காத நிலையில்,இறைவனுக்கு தான் தெரியும் என முதலமைச்சர் சொன்னதில் என்ன தவறு உள்ளது. முதலமைச்சர் தெய்வ பக்தி உள்ளவர், ஸ்டாலினுக்கு கடவுள் பெயர் சொன்னாலே கோபம் வரும்.

கொரோனா தடுப்பு பணியில் இரவு பகல் பாராமல் ஈடுபடும் அரசின் மீது பழிபோடுவதை ஸ்டாலின் நிறுத்தி கொள்ள வேண்டும்.

அதிமுக அரசு தான் கொரோனாவை தோற்றுவித்தது போல தினமும் அறிக்கை விடுவதை ஸ்டாலின் நிறுத்த வேண்டும். அறிக்கைகளால் மக்களை குழப்புவது, அவதூறாக கருத்து வெளியிடுவது கண்டனத்திற்குரியது என கூறினார்.