நர்ஸ், ஆம்புலன்ஸ் டிரைவர் பிரசவம் பார்த்ததில் பெண் சாவு

திருவண்ணாமலை, 

திருவண்ணாமலை மாவட்டம் ஆரணியை அடுத்த இருங்கூர் கிராமத்தை சேர்ந்தவர் அறிவிழிவேந்தன்.இவருடைய மனைவி ஜமுனா (வயது 29) நிறைமாத கர்ப்பிணியாக இருந்தார். நேற்று முன்தினம் இரவு ஜமுனாவுக்கு பிரசவ வலி ஏற்பட்டது.

இதையடுத்து குடும்பத்தினர் மற்றும் உறவினர்கள் அவரை உடனடியாக மாம்பாக்கம் அரசு ஆரம்ப சுகாதார நிலைய ஆஸ்பத்திரியில் சேர்த்தனர். அங்கு அவருக்கு நர்ஸ் திவ்யா, 108 ஆம்புலன்ஸ் டிரைவர் பிரசவம் பார்த்ததாக தெரிகிறது. நேற்று அதிகாலையில் ஜமுனாவுக்கு ஆண் குழந்தை பிறந்தது.

குழந்தை பிறந்த ஜமுனாவுக்கு திடீரென ரத்த போக்கு அதிகமானதால் தாயையும் குழந்தையையும் 108 ஆம்புலன்ஸ் மூலம் ஆரணி அரசு ஆஸ்பத்திரிக்கு அனுப்பி வைத்தனர். அங்கு ஜமுனாவை பரிசோதித்த டாக்டர்கள் அவர் வழியிலேயே இறந்துவிட்டதாக கூறினர். அவரது குழந்தை அவசர பிரிவில் சேர்க்கப்பட்டு தொடர்ந்து சிகிச்சை அளிக்கப்பட்டு வருகிறது. குழந்தை பிறந்த சந்தோஷத்தில் இருந்த குடும்பத்தினர் மற்றும் உறவினர்கள் ஜமுனா இறந்ததை கேட்டு அதிர்ச்சி அடைந்தனர்.

ஆஸ்பத்திரி முற்றுகை

மாம்பாக்கம் ஆரம்ப சுகாதார நிலைய ஆஸ்பத்திரியில் போதிய டாக்டர்கள் இல்லாமல் நர்சும், ஆம்புலன்ஸ் டிரைவரும் பிரசவம் பார்த்ததால் தான் ஜமுனா இறந்ததாக கூறி ஆரணி அரசு ஆஸ்பத்திரி முன்பு அவரது குடும்பத்தினர் மற்றும் உறவினர்கள் திடீரென முற்றுகை போராட்டத்தில் ஈடுபட்டனர். அப்போது அவர்கள், ஜமுனா இறந்ததற்கு காரணமானவர்கள் மீது நடவடிக்கை எடுக்க வலியுறுத்தி கோஷங்களை எழுப்பினர்.

இதுபற்றி தகவல் அறிந்ததும் ஆரணி நகர போலீசார் சம்பவ இடத்துக்கு வந்து முற்றுகை போராட்டத்தில் ஈடுபட்டவர்களிடம் பேச்சுவார்த்தை நடத்தினர். அதைத் தொடர்ந்து போராட்டத்தில் ஈடுபட்டவர்கள் அங்கிருந்து கலைந்து சென்றனர்.