மோட்டார் சைக்கிள் திருடிய 2 வாலிபர்கள் கைது

கன்னியாகுமரியை அடுத்த வடக்குகுண்டல் பகுதியில் கடந்த சில நாட்களுக்கு முன் வீடு புகுந்து மோட்டார் சைக்கிளை மர்ம நபர்கள் திருடிச் சென்றனர். இதுகுறித்து கன்னியாகுமரி போலீசார் வழக்குப்பதிவு செய்து விசாரணை நடத்தி மர்ம நபர்களை தேடி வந்தனர்.

இந்தநிலையில் திருநெல்வேலியில் வாகனச்சோதனையின் போது 2 வாலிபர்கள் பிடிபட்டனர். அவர்களிடம் போலீசார் விசாரணை நடத்தியதில் அவர்கள் வடக்கு குண்டல் பகுதியில் மோட்டார் சைக்கிள் திருடியவர்கள் என்பது தெரியவந்தது. மேலும் அவர்களிடம் நடத்திய விசாரணையில் தென்காசி மாவட்டம் குருவன்கோட்டையை சேர்ந்த மகாபிரபு (வயது 27), அதே ஊரைச் சேர்ந்த கனிராஜ் (22) என்பதும் தெரியவந்தது இதனைத்தொடர்ந்து கன்னியாகுமரி போலீசாருக்கு தகவல் தெரிவிக்கப்பட்டது. அதன் அடிப்படையில் சப்-இன்ஸ்பெக்டர் ரவிச்சந்திரன் தலைமையிலான போலீசார் வாலிபர்கள் 2 பேரையும் கைது செய்து நாகர்கோவில் சிறையில் அடைத்தனர்.