கஞ்சா வைத்திருந்த 2 வாலிபர்கள் கைது

அரக்கோணத்தை அடுத்த அருகிலபாடி பகுதியில் கஞ்சா விற்பதாக அரக்கோணம் தாலுகா போலீசாருக்கு ரகசிய தகவல் கிடைத்தது. அதன் பேரில் இன்ஸ்பெக்டர் பழனிவேல் தலைமையிலான போலீசார் சம்பவ பகுதிகளில் ரோந்து பணியில் ஈடுபட்டிருந்தனர். அப்போது காஞ்சீபுரம் ரோட்டில் உள்ள பஸ் நிறுத்தம் அருகே நின்றிருந்த இரண்டு பேரை போலீசார் பிடித்து விசாரித்தனர்.

விசாரணையில் அவர்கள் வேலூர்பேட்டை பகுதியை சேர்ந்த விக்கி என்கிற விக்னேஷ் (வயது 25) மற்றும் அரக்கோணம் வின்டர்பேட்டை பகுதியை சேர்ந்த சங்கீத் (19) என்பதும், அவர்கள் கஞ்சா வைத்திருந்ததும் தெரியவந்தது. இதனையடுத்து அவர்களிடமிருந்து 1 கிலோ 100 கிராம் கஞ்சாவை போலீசார் பறிமுதல் செய்து, இருவரையும் கைது செய்து சிறையில் அடைத்தனர்.