2 டன் ரேஷன் துவரம் பருப்பு பறிமுதல்

ராமநாதபுரம் அருகே போலீசார் நடத்திய அதிரடி சோதனையில் 2 டன் ரேஷன் துவரம் பருப்பு பறிமுதல் செய்யப்பட்டது. இது தொடர்பாக 2 பேர் கைது செய்யப்பட்டனர்.

2 டன் ரேஷன் துவரம் பருப்பு பறிமுதல்

ராமநாதபுரம் மாவட்டம் பார்த்திபனூர் பகுதியில் ரேஷன் பொருட்கள் கடத்திச் செல்லப்படுவதாக ராமநாதபுரம் குடிமை பொருள் வழங்கல் குற்றபுலனாய்வு பிரிவு போலீசாருக்கு தகவல் கிடைத்தது. இதைத்தொடர்ந்து போலீஸ் சூப்பிரண்டு சினேகபிரியா உத்தரவின் பேரில் சப்-இன்ஸ்பெக்டர் அசோக் தலைமையில் தலைமை காவலர்கள் குமாரசாமி, முத்துகிருஷ்ணன், தெய்வேந்திரன் உள்ளிட்ட போலீசார் அந்த பகுதியில் சென்று தீவிர வாகன சோதனையில் ஈடுபட்டனர்.

அப்போது அந்த வழியாக வந்த சரக்கு வாகனத்தை சந்தேகத்தின் அடிப்படையில் தடுத்து நிறுத்தி சோதனையிட்டபோது அதில் 42 மூடைகளில் தலா 50 கிலோ எடையுள்ள 2 ஆயிரத்து 100 கிலோ ரேஷன் துவரம் பருப்பு இருந்தது தெரியவந்தது.

2 பேர் கைது

இதை தொடர்ந்து துவரம் பருப்பை வாகனத்துடன் பறிமுதல் செய்த போலீசார் இது தொடர்பாக முதுகுளத்தூர் அருகே உள்ள கீழத்தூவல் பகுதியைச் சேர்ந்த இருளாண்டி மகன் கார்த்திக் (வயது 28), மேலத்தூவல் பகுதியைச் சேர்ந்த வேலுச்சாமி மகன் பொன்னுச்சாமி (46) ஆகிய இருவரையும் கைது செய்தனர்.

பறிமுதல் செய்யப்பட்ட ரேஷன் துவரம் பருப்பு ராமநாதபுரம் நுகர் பொருள் வாணிபக் கிடங்கில் ஒப்படைக்கப்பட்டது.