வெவ்வேறு விபத்துகளில் 2 பேர் படுகாயம்

சிவகாசி, 

சிவகாசி அருகே வெவ்வேறு விபத்துகளில் 2 பேர் படுகாயம் அடைந்தனர்.

பூ வியாபாரி

சிவகாசி அருகே உள்ள விளாம்பட்டியை சேர்ந்தவர் கார்த்திக்ராஜ் (வயது 40). இவர் பூ வியாபாரம் செய்து வருகிறார். சம்பவத்தன்று தனது மோட்டார் சைக்கிளில் சிவகாசி-விளாம்பட்டி ரோட்டில் வந்து கொண்டிருந்த போது அந்த வழியாக வந்த ஆலங்குளம் போலீஸ் நிலையத்தில் தலைமை காவலராக பணியாற்றி வரும் ராமையா மகன் சேகர் என்பவர் ஓட்டி வந்த மோட்டார் சைக்கிள் மோதியதாக கூறப்படுகிறது.

இதில் பூ வியாபாரி கார்த்திக்ராஜ்க்கு பலத்த காயம் ஏற்பட்டது. உடனே அங்கிருந்தவர்கள் அவரை மீட்டு விருதுநகர் அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து கார்த்திக்ராஜ் கொடுத்த புகாரின் பேரில் மாரனேரி போலீசார் வழக்குபதிவு செய்து விசாரணை நடத்தி வருகிறார்கள்.

முதியவர் காயம்

இதேபோல் சிவகாசி சாட்சியாபுரத்தை சேர்ந்தவர் ஆறுமுகம் (85). இவர் சம்பவத்தன்று சிவகாசி-ஸ்ரீவில்லிபுத்தூர் ரோட்டில் நடந்து வந்த போது அந்த வழியாக வந்த மோட்டார் சைக்கிள் முதியவர் ஆறுமுகம் மீது மோதியது. இதில் அவர் பலத்த காயம் அடைந்தார்.

உடனே அருகில் இருந்தவர்கள் அவரை மீட்டு மதுரை அரசு ஆஸ்பத்திரிக்கு அனுப்பி வைத்தனர். அங்கு அவர் சிகிச்சை பெற்று வருகிறார். இதுகுறித்து அவரது மகன் பாலகிருஷ்ணன் கொடுத்த புகாரின் பேரில் சிவகாசி டவுன் போலீசார் வழக்குபதிவு செய்து விசாரணை நடத்தி வருகிறார்கள்.