ஸ்கூட்டர்களில் சாராயம் கடத்தி வந்த 2 பேர் கைது

விழுப்புரம் அருகே ஆழாங்கால் பகுதியில் வளவனூர் போலீஸ் இன்ஸ்பெக்டர் ரத்தினசபாபதி, சப்-இன்ஸ்பெக்டர் அன்பழகன் மற்றும் போலீசார் தீவிர வாகன சோதனையில் ஈடுபட்டனர். அப்போது அந்த வழியாக 2 ஸ்கூட்டர்களில் வந்த 2 பேரை சந்தேகத்தின்பேரில் போலீசார் வழிமறித்து சோதனை செய்ததில் அவர்கள் வந்த ஸ்கூட்டர்களில் 20 லிட்டர் கொண்ட 5 பாக்கெட்டுகளில் 100 லிட்டர் சாராயம் இருந்தது கண்டுபிடிக்கப்பட்டது. விசாரணையில் அவர்கள் இருவரும் புதுச்சேரி மாநிலம் மதகடிப்பட்டை அடுத்த ஆண்டியார்பாளையத்தை சேர்ந்த பாலச்சந்திரன் (வயது 30), மதகடிப்பட்டு மேட்டுத்தெருவை சேர்ந்த சிவானந்தன் (36) என்பதும், இவர்கள் இருவரும் புதுச்சேரியில் இருந்து சாராய பாக்கெட்டுகளை கடத்தி வந்ததும் தெரியவந்தது.

இதையடுத்து பாலச்சந்திரன், சிவானந்தன் ஆகிய இருவரையும் போலீசார் கைது செய்து அவர்களிடமிருந்த சாராய பாக்கெட்டுகள் மற்றும் கடத்தலுக்கு பயன்படுத்தப்பட்ட 2 ஸ்கூட்டர்களையும் பறிமுதல் செய்தனர்.