விபத்துகளில் மூதாட்டி உள்பட 2 பேர் பலி

வையம்பட்டி:

தொழிலாளி சாவு

திருச்சி மாவட்டம், வையம்பட்டியை அடுத்த கேசவ அம்பலகாரனூர் பகுதியை சேர்ந்தவர் கருப்பையா(வயது 60). கூலித் தொழிலாளியான இவர் நேற்று மொபட்டில் திண்டுக்கல் - திருச்சி தேசிய நெடுஞ்சாலையில் கருங்குளம் பிரிவு சாலை அருகே சென்றார்.

அப்போது அந்த வழியாக வந்த வாகனம் மோதியதில், அவர் சம்பவ இடத்திலேயே பரிதாபமாக உயிரிழந்தார். இதையடுத்து அவரது உடல் பிரேத பரிசோதனைக்காக மணப்பாறை அரசு மருத்துவமனைக்கு அனுப்பி வைக்கப்பட்டது. இந்த சம்பவம் தொடர்பாக வையம்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.

மூதாட்டி

துவரங்குறிச்சி அருகே உள்ள முக்கன்பாலம் பகுதியை சேர்ந்தவர் நாச்சம்மாள்(60). இவர் நேற்று மதுரை - திருச்சி தேசிய நெடுஞ்சாலையில் முக்கன்பாலம் பிரிவு ரோடு அருகே சாலையை கடக்க முயன்றார். அப்போது அந்த வழியாக வந்த வாகனம் அவர் மீது மோதியது. இதில் அவர் சம்பவ இடத்திலேயே பரிதாபமாக உயிரிழந்தார்.

இது பற்றி தகவல் அறிந்த போலீசார் அங்கு வந்து, அவரது உடலை கைப்பற்றி மணப்பாறை அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இது குறித்து துவரங்குறிச்சி போலீசார் வழக்குப்பதிவு செய்து விசாரணை நடத்தி வருகின்றனர்.