சில்வாசாவில் மாடுகளை திருடி இறைச்சி கூடத்தில் விற்று வந்த 2 பேர் கைது

சில்வாசா, 

சில்வாசா கான்வெல் பகுதியில் வாகனத்தில் அடையாளம் தெரியாத ஆசாமி மாடுகளை கடத்தி செல்வதாக போலீசாருக்கு தகவல் கிடைத்தது. இதன்பேரில் போலீசார் அப்பகுதியில் வாகன சோதனை நடத்தி மாடுகளை கடத்தி சென்ற வாகனத்தை மடக்கி பிடித்தனர். மாடுகள் மயங்கிய நிலையில் கிடந்ததால் வாகனத்தில் வந்த டிரைவர் உள்பட 2 பேரை பிடித்து விசாரித்தனர். இதில், அவர்கள் நஜிஷ் ரயீஸ் (வயது19), சல்மான் சேக் (26) என்பதும், இவர்கள் சுற்றித்திரியும் மாடுகளுக்கு மயக்க மருந்துகலந்த தீவனத்தை கொடுத்து கடத்தி சென்று இறைச்சி கூடத்தில் விற்று பணம் சம்பாதித்து வந்தது தெரியவந்தது. இதையடுத்து போலீசார் வழக்கு பதிவு செய்து 2 பேரையும் கைது செய்தனர். இந்த சம்பவத்தில் வேறு யாருக்கேனும் தொடர்பு உள்ளதா? என்பது குறித்தும் விசாரித்து வருகின்றனர்.