மேற்கு வங்காளம்; 100 நாள் வேலை திட்டத்தில் தகுதியற்ற நபர்கள் என புகார்கள் வந்தன: பா.ஜ.க. குற்றச்சாட்டு

கொல்கத்தா,

மேற்கு வங்காள முதல்-மந்திரி மம்தா பானர்ஜி சமீபத்தில் செய்தியாளர்களிடம் பேசும்போது, மேற்கு வங்காள மாநிலத்திற்கு, 100 நாட்கள் வேலை திட்டத்திற்கான உரிய தொகையை தராமல் மத்திய அரசு நிறுத்தி விட்டது.

நாடாளுமன்றத்தில் தாக்கல் செய்த மத்திய பட்ஜெட்டில் கூட எங்களுடைய மாநிலத்திற்கு என்று எதுவும் அளிக்கப்படவில்லை. அதனால், மேற்கு வங்காள மக்களுக்கு எதிரான மத்திய அரசின் சர்வாதிகார போக்கை கண்டித்து வருகிற 29 மற்றும் 30 ஆகிய நாட்களில் அம்பேத்கார் சிலை முன் போராட்டம் நடத்தப்படும் என கூறினார்.

இந்நிலையில், மேற்கு வங்காளத்திற்கு விடுவிக்க வேண்டிய நிதியை மத்திய அரசு வழங்காமல் இருப்பதற்கு எதிராகவும், மத்திய அரசின் மக்கள் விரோத கொள்கைகளுக்கு எதிராகவும் கொல்கத்தா நகரில் உள்ள அம்பேத்கார் சிலை முன்பு மம்தா பானர்ஜி இன்று 2 நாள் தர்ணா போராட்டம் தொடங்கி உள்ளார்.

இதேபோன்று, ஜனநாயகம், கூட்டாட்சி முறை மற்றும் நாடாளுமன்றம் ஆகியவற்றை பாதுகாக்க வேண்டும் என்று கோரி நாடாளுமன்றத்தில் அம்பேத்கார் சிலை முன் திரிணாமுல் காங்கிரஸ் எம்.பி.க்கள் இன்று ஆர்ப்பாட்டத்தில் ஈடுபட்டனர்.

இந்நிலையில், போராட்டத்தில் ஈடுபட்டபோது பேசிய மம்தா பானர்ஜி, நான் திரிணாமுல் காங்கிரசின் தலைவராக தர்ணா போராட்டத்தில் ஈடுபட்டு உள்ளேன். முதல்-மந்திரியாக அல்ல என்று கூறினார்.

தொடர்ந்து அவர், நான் மக்களுக்காக பணியாற்றுகிறேன். மக்களுக்காக போராடுகிறேன். 100 நாள் வேலைக்கு மத்திய அரசால் பணம் வழங்காமல் தடுக்கப்பட்டு உள்ள பொதுஜனத்தின் உரிமைகளுக்காக தர்ணா போராட்டத்தில் ஈடுபட்டு உள்ளேன்.

தேவைப்பட்டால் பிரதமர் இல்லம் அருகே அமர்ந்து மம்தாவால் தர்ணா போராட்டத்தில் ஈடுபடவும் முடியும். எனக்கு அந்த தைரியம் உள்ளது என்று மம்தா பானர்ஜி கூறியுள்ளார்.

நீங்கள் பிரிவு 27 என கூறப்படும் ஒன்றை பயன்படுத்தி, இந்த நிதியை தடுத்து இருக்கிறீர்கள். ஆனால் நினைவில் கொள்ளுங்கள், 2024-ம் ஆண்டில் பிரிவு 420-ன் கீழ் மக்கள் வாக்களித்து உங்களை வெளியேற்றி விடுவார்கள். நீங்கள் அதிகாரத்திற்கு வரமுடியாது என்று கூறியுள்ளார்.

இதுபற்றி மேற்கு வங்காள பா.ஜ.க. தலைவர் சுகந்த மஜும்தார் இன்று கூறும்போது, மேற்கு வங்காளத்தில் 100 நாள் வேலை திட்டத்தில், தகுதி அற்றவர்கள் பலனடைந்து வருகின்றனர் என்று புகார்கள் வந்தன. இதுபற்றி ஆய்வு செய்ய குழு ஒன்றை மத்திய அரசு அனுப்பியது.

அதில், சில குறைபாடுகள் இருப்பது கண்டறியப்பட்டன. அவர்கள் (மாநில அரசு) முறையான அறிக்கை ஒன்றை அளிக்கும் வரை மத்திய அரசிடம் இருந்து நிதியை பெற முடியாது என்று அவர் கூறியுள்ளார்.