காங்கிரசில் இணைந்தார் தமிழக முன்னாள் டி.ஜி.பி.

புதுடெல்லி,

தமிழ்நாடு தீயணைப்புத்துறை டி.ஜி.பி.யாக இருந்தவர் பிராஜ் கிஷோர் ரவி. பீகார் மாநிலத்தை சேர்ந்த இவர் கடந்த செப்டம்பர் மாதம் விருப்ப ஓய்வு பெற்றார். அவர் காங்கிரசில் இணையப்போவதாக செய்திகள் வெளியாகின.

இந்நிலையில் பிராஜ் கிஷோர் ரவி நேற்று காங்கிரசில் தன்னை இணைத்துக்கொண்டார். டெல்லியில் உள்ள கட்சி தேசிய அலுவலகத்தில் காங்கிரஸ் காரியக்கமிட்டி உறுப்பினரும், மாநிலங்களவை உறுப்பினருமான சையத் நசீர் உசேன் மற்றும் பீகார் மாநில காங்கிரஸ் தலைவரும், மாநிலங்களவை உறுப்பினருமான அகிலேஷ் பிரசாத்சிங் ஆகியோரது முன்னிலையில் இணைப்பு நிகழ்ச்சி நடைபெற்றது.

இதுகுறித்து பிராஜ் கிஷோர் கூறுகையில், "நான் காங்கிரஸ் குடும்பத்தைச் சேர்ந்தவன். எனது ரத்தத்திலேயே அது ஊறிப்போய் இருக்கிறது. எனது அரசியல் பிரவேசம் தேசிய அளவில் இருக்கும். பீகாரிலும் இருக்கும். வர இருக்கிற நாடாளுமன்ற தேர்தலில் நான் போட்டியிட கட்சி வாய்ப்பு அளிக்கும்" என்று அவர் தெரிவித்தார்.