தினமும் சராசரியாக 6 பாலியல் வன்கொடுமை சம்பவங்கள்; டெல்லியில் பெண்களுக்கு எதிரான குற்றங்கள் அதிகரிப்பு

டெல்லி,

கடந்த ஆண்டுடன் ஒப்பிடும்போது தலைநகர் டெல்லியில் பெண்களுக்கு எதிரான குற்றங்கள் 17 சதவிகிதம் அதிகரித்துள்ளது. இது தொடர்பாக டெல்லி காவல்துறையின் தரவுகள் அடிப்படையில் இந்த ஆண்டு (ஜனவரி 1) தொடக்கம் முதல் ஜூலை 15-ம் தேதி வரையில் பெண்களுக்கு எதிராக நடைபெற்ற குற்றங்கள் குறித்த விவரங்கள் பின்வருமாறு;-

கடந்த ஆண்டு ஜனவரி 1 முதல் ஜூலை 15 வரை ஒப்பிடும்போது இந்த ஆண்டு டெல்லியில் பெண்களுக்கு எதிரான குற்றங்கள் 17 சதவிகிதம் அதிகரித்துள்ளது.

டெல்லியில் தினமும் சராசரியாக 6 பாலியல் வன்கொடுமை சம்பவங்கள் பதிவாகுகிறது. பெண்கள் மீதான தாக்குதல் சம்பவங்கள் 19 சதவிகிதம் அதிகரித்துள்ளது. கணவர், கணவரின் குடும்ப உறுப்பினர்கள் பெண்கள் மீது குடும்ப வன்முறையில் ஈடுபடுவது 29 சதவிகிதம் அதிகரித்துள்ளது.

நடப்பு ஆண்டு ஜனவரி 1 முதல் ஜூலை 15 வரை டெல்லியில் பெண்களுக்கு எதிரான குற்றங்கள் தொடர்பாக மொத்தம் 7 ஆயிரத்து 887 வழக்குகள் பதிவு செய்யப்பட்டுள்ளது. இது கடந்த ஆண்டு இதே காலகட்டத்தில் பதிவான 6 ஆயிரத்து 747 வழக்குகளை விட அதிகமாகும்.

இந்த ஆண்டு ஜூலை 15 வரை டெல்லியில் 1,100 பாலியல் வன்கொடுமை வழக்குகள் பதிவு செய்யப்பட்டுள்ளது. இது கடந்த ஆண்டு இந்த காலகட்டத்தில் பதியப்பட்ட 1,033 பாலியல் வன்கொடுமை வழக்குகளை விட அதிகமாகும்.

கணவர், கணவரின் குடும்ப உறுப்பினர்கள் பெண்கள் மீது குடும்ப வன்முறையில் ஈடுபடுவது தொடர்பாக 2 ஆயிரத்து 704 வழக்குகள் பதிவு செய்யப்பட்டுள்ளது. இது கடந்த ஆண்டு இதேகாலகட்டத்தில் பதிவான 2 ஆயிரத்து 96-ஐ விட சற்று குறைவாகும். வரதட்சனை கொண்டு தொடர்பாக 69 மரணங்கள் நடைபெற்றுள்ளதாகவும் டெல்லி காவல்துறை தரவுகளில் தெரிவிக்கப்பட்டுள்ளது.