பரபரப்பாக இயங்கிய சர்வதேச விமான நிலையங்கள் - டெல்லிக்கு 2-வது இடம்

புதுடெல்லி,

பயணிகள் எண்ணிக்கை மற்றும் விமான சேவைகள் ஆகியவற்றின் அடிப்படையில் உலகின் மிக பரபரப்பான 10 விமான நிலையங்களின் பட்டியல் ஒவ்வொரு ஆண்டும் வெளியிடப்பட்டு வருகிறது. இதில் கடந்த ஆண்டு முதல் இடத்தில் அமெரிக்காவின் அட்லாண்டா விமான நிலையம், 2-வது இடத்தில் துபாய் விமான நிலையம் ஆகியவை இருந்தன. 

இந்த நிலையில் 2022 மார்ச் மாத நிலவரப்படி இந்த பட்டியலில் துபாய் விமான நிலையத்தை பின்னுக்குத் தள்ளி, இந்தியாவின் டெல்லி விமான நிலையம் 2-வது இடத்தைப் பிடித்துள்ளது. 

கடந்த மார்ச் மாதம், அட்லாண்டா விமான நிலையத்தில் 44.22 லட்சம் பயணிகளும், டெல்லி விமான நிலையத்தில் 36.11 லட்சம் பயணிகளும், துபாய் விமான நிலையத்தில் 35.54 லட்சம் பயணிகளும் பயணித்துள்ளனர். 

2019-ல் உலக அளவில் 23-வது இடத்தில் இருந்த டெல்லி விமான நிலையம், 2022 ஆம் ஆண்டில் 2-வது இடத்திற்கு முன்னேறியுள்ளது. 2021-ல் டெல்லி விமான நிலையத்தில் இருந்து 3.16 கோடி உள்நாட்டு பயணிகளும், 54.9 லட்சம் சர்வதேச பயணிகளும் பயணம் செய்துள்ளனர்.