பஞ்சாபில் இன்று அர்விந்த் கெஜ்ரிவால் பங்கேற்கும் பிரம்மாண்ட வெற்றி கொண்டாட்ட பேரணி!

அமிர்தசரஸ்,

உத்தரபிரதேசம், உத்தரகாண்ட், மணிப்பூர், பஞ்சாப் மற்றும் கோவா ஆகிய 5 மாநிலங்களில் சமீபத்தில் நடந்து முடிந்த சட்டசபை தேர்தல்களில் பஞ்சாப்பை ஆம் ஆத்மியும், மீதமுள்ள 4 மாநிலங்களை பா.ஜனதாவும் கைப்பற்றின.

பஞ்சாப் சட்டசபை தேர்தலில் மொத்தமுள்ள 117 தொகுதிகளில் ஆம் ஆத்மி 92 தொகுதிகளை கைப்பற்றி பெரும்பான்மையுடன் வெற்றி பெற்றுள்ளது. ஆட்சியமைக்க 59 இடங்களில் வெற்றி பெற வேண்டும் என்ற நிலையில், 92 இடங்களை கைப்பற்றி ஆம் ஆத்மி பஞ்சாபில் முதல் முறையாக ஆட்சியைப் பிடிக்கிறது.

இந்த நிலையில், பஞ்சாபின் முதல் மந்திரி வேட்பாளர் பகவந்த் மான் வருகிற 16-ஆம் தேதி முதல் மந்திரியாக பதவியேற்கிறார். பகத் சிங் பிறந்த ஊரான கட்கர் காலானில் முதல் மந்திரியாக பதவியேற்க உள்ளார். 

இதற்கிடையே பஞ்சாபில் பெரும்பான்மைக்கும் மிக அதிகமான தொகுதிகளை ஆம் ஆத்மி கட்சி கைப்பறியதற்கு, தேர்தலில் ஆம் ஆத்மிக்கு வாக்களித்த பொதுமக்களுக்கு நன்றி தெரிவிக்கும் விதமாக இன்று அமிர்தசரசில் ஆம் ஆத்மி கட்சியின் சார்பில் வெற்றி கொண்டாட்ட பேரணி நடைபெற உள்ளது. 

இந்த பேரணியில்  ஆம் ஆத்மி கட்சியின் தேசிய ஒருங்கிணைப்பாளர் அர்விந்த் கெஜ்ரிவால் மற்றும் முதல் மந்திரி வேட்பாளர் பகவந்த் மான் உள்ளிட்ட முக்கிய தலைவர்கள் கலந்து கொள்கின்றனர்.

இதனையொட்டி, அர்விந்த் கெஜ்ரிவால் மற்றும் பகவந்த் மான்  ஆகியோரின் கட்அவுட்கள் மற்றும் சுவரொட்டிகள் அமிர்தசரஸ் நகர சாலைகள் மற்றும் பாதைகளை அலங்கரித்துள்ளன.