ஆத்தூர் அருகே கார்- மொபட் மோதல்; கல்லூரி மாணவர் பலி-நண்பர்கள் 2 பேர் படுகாயம்

ஆத்தூர்:

ஆத்தூர் அருகே கார்- மொபட் மோதிக்கொண்ட விபத்தில் கல்லூரி மாணவர் பலியானார். நண்பர்கள் 2 பேர் படுகாயம் அடைந்தனர்.

கள்ளகுறிச்சி மாவட்டம் எறவா மேலூரை சேர்ந்த பாலகிருஷ்ணன் மகன் பிரதீப் (வயது 22). இவருடைய நண்பர்கள் பாலு (21), சந்துரு (21). இவர்கள் 3 பேரும் ஒரு கல்லூரியில் ஒன்றாக படித்து வந்தனர்.

3 பேரும், சேலத்தில் ஒரு திருமண நிகழ்ச்சிக்கு கேட்டரிங் வேலைக்கு சென்று விட்டு ஆத்தூர் நோக்கி மொபட்டில் வந்து கொண்டிருந்தனர். ஆத்தூர் கோட்டை புறவழிச்சாலை பாலம் அருகே வந்த போது அந்த வழியாக வந்த கார், மொபட் மீது மோதியது.

இதில் பிரதீப் உள்பட 3 பேரும் தூக்கி வீசப்பட்டனர். இதில் பிரதீப் சம்பவ இடத்திலேயே பரிதாபமாக இறந்தார். மற்ற 2 பேரும் லேசான காயம் அடைந்தனர். விபத்து குறித்து ஆத்தூர் போலீசார் வழக்குப்பதிவு செய்து விசாரணை நடத்தினர்.