பிளஸ்-2 தேர்வு இன்று தொடங்குகிறது: 82 மையங்களில் ஏற்பாடுகள் தயார்

நாமக்கல்:

தமிழகத்தில் பிளஸ்-2 பொதுத்தேர்வு இன்று (வியாழக்கிழமை) தொடங்குகிறது. நாமக்கல் மாவட்டத்தில் அரசு மற்றும் தனியார் பள்ளிகள் என மொத்தம் 200 பள்ளிகளை சேர்ந்த 9 ஆயிரத்து 729 மாணவர்கள், 10 ஆயிரத்து 138 மாணவிகள் என மொத்தம் 19 ஆயிரத்து 867 மாணவ, மாணவிகள் இந்த தேர்வை எழுதுகின்றனர். இதற்காக அனைத்து மாணவர்களுக்கும் தேர்வு அறை அனுமதி சீட்டுகள் ஏற்கனவே வழங்கப்பட்டுள்ளன. 

மாணவ-மாணவிகள் தேர்வு எழுத வசதியாக மாவட்டத்தில் 82 மையங்கள் ஏற்படுத்தப்பட்டு உள்ளன. இந்த மையங்களில் குடிநீர், கழிப்பிடம் மற்றும் தேர்வு எழுத மாணவ-மாணவிகளுக்கு தேவையான அனைத்து ஏற்பாடுகளும் தயார் நிலையில் உள்ளன.

இதனிடையே நேற்று மாணவ, மாணவிகளின் பதிவு எண்களை, அவர்களுக்கு ஒதுக்கப்பட்ட மேஜைகளில் எழுதும் பணி நடந்தது. நாமக்கல் அரசு பெண்கள் மேல்நிலைப்பள்ளியில் தேர்வு எழுதும் மாணவிகளின் பதிவு எண்களை, ஆசிரிய-ஆசிரியைகள் மேஜைகளில் எழுதினர்.

மாவட்டம் முழுவதும் பிளஸ்-2 தேர்வுக்கான பணியில் 10 வினாத்தாள் கட்டுகாப்பாளர்கள், 86 முதன்மை கண்காணிப்பாளர்கள், 86 துணை அலுவலர்கள், 120 நிரந்தர பறக்கும் படையினர், 1,207 அறை கண்காணிப்பாளர்கள் ஈடுபடுத்தப்பட உள்ளனர்.