பல்வேறு இடங்களில் திருடப்பட்ட ரூ.10¾ லட்சம் மதிப்பிலான 73 செல்போன்கள் மீட்பு-போலீஸ் சூப்பிரண்டு கலைச்செல்வன், உரியவர்களிடம் ஒப்படைத்தார்

தர்மபுரி:

தர்மபுரி மாவட்டத்தில் பல்வேறு இடங்களில் திருடப்பட்டவற்றில் இருந்து மீட்கப்பட்ட ரூ.10 லட்சத்து 70 ஆயிரம் மதிப்பிலான 73 செல்போன்களை போலீஸ் சூப்பிரண்டு கலைச்செல்வன் உரியவர்களிடம் ஒப்படைத்தார்.

தர்மபுரி மாவட்டத்தில் கடந்த 2021-ம் ஆண்டு டிசம்பர் மாதம் 23-ந் தேதி முதல் கடந்த 25-ந் தேதி வரையிலான 4 மாதங்களில் செல்போன்கள் திருட்டு, செல்போன்கள் தொலைந்து போனது போன்ற புகார்கள் தொடர்பாக சைபர் கிரைம் போலீசார் தீவிர விசாரணை நடத்தினார்கள். இந்த விசாரணையின் அடிப்படையில் 73 செல்போன்கள் மீட்கப்பட்டன.

மீட்கப்பட்ட செல்போன்களின் மதிப்பு ரூ.10 லட்சத்து 70 ஆயிரம் ஆகும். இந்த செல்போன்களை உரியவர்களிடம் ஒப்படைக்கும் நிகழ்ச்சி தர்மபுரி மாவட்ட போலீஸ் சூப்பிரண்டு அலுவலகத்தில் நேற்று நடைபெற்றது. நிகழ்ச்சியில் மாவட்ட போலீஸ் சூப்பிரண்டு கலைச்செல்வன் கலந்து கொண்டு செல்போன்களை உரியவர்களிடம் ஒப்படைத்தார்.

அப்போது அவர் கூறியதாவது:-

செல்போனில் பணப்பரிமாற்றம் மற்றும் தகவல் பரிமாற்றம் செய்யும் போது மிகவும் கவனமாக இருக்க வேண்டும். செல்போனில் தனிப்பட்ட விவரங்கள், முக்கியமான தகவல்கள் சேமித்து வைக்கப்பட்டு இருப்பதால் அதை பாதுகாப்பாக வைத்துக்கொள்ள வேண்டும். செல்போன் மூலம் நடைபெறும் மோசடிகள் குறித்த தகவல்களை சைபர் கிரைம் போலீசாருக்கு உடனடியாக தெரிவிக்க வேண்டும்.

சமீப காலமாக பெண்களுக்கு எதிரான குற்றச்செயல்கள் அதிகரித்து வருகின்றன. சமூக வலைதளங்கள் மூலமாக முகம் தெரியாத நபர்கள் காதலிப்பதாக கூறி பெண்களை ஏமாற்றும் சம்பவங்கள் நடக்கின்றன. இதை தடுக்க குழந்தைகள், மாணவ-மாணவிகள், செல்போனை எப்படி பயன்படுத்துகிறார்கள் என்று பெற்றோர் கண்காணிக்க வேண்டும். இதன் மூலம் அவர்கள் பாதிப்புக்கு உள்ளாவதை தடுக்க வேண்டும்.

இவ்வாறு போலீஸ்சூப்பிரண்டு கலைச்செல்வன் பேசினார்.

இந்த நிகழ்ச்சியில் மாவட்ட கூடுதல் போலீஸ் சூப்பிரண்டுகள் அண்ணாமலை, குணசேகரன், புஷ்பராஜ், போலீஸ் இன்ஸ்பெக்டர்கள் விஜயலட்சுமி, அன்பழகன் மற்றும் போலீசார் கலந்துகொண்டனர்.