பேச்சுப்போட்டியில் வெற்றி பெற்ற மாணவர்களுக்கு பரிசு

தமிழ் வளர்ச்சித்துறையின் சார்பில் சட்டமேதை டாக்டர் அம்பேத்கர் பிறந்தநாளையொட்டி அரியலூர் மாவட்டத்தில் பள்ளி, கல்லூரி மாணவ-மாணவிகளுக்கான மாவட்ட அளவிலான அம்பேத்கர் பற்றிய பல்வேறு தலைப்புகளில் பேச்சு போட்டிகள் நடந்தது. இதில் ஜெயங்கொண்டம் பாத்திமா மெட்ரிக் மேல்நிலைப்பள்ளியின் 9-ம் வகுப்பு மாணவி வினோதராணி முதலிடமும், செந்துறை அரசு பெண்கள் மேல்நிலைப்பள்ளியின் பிளஸ்-1 மாணவி சுஜீதா 2-வது இடமும், அரியலூர் அரசு மேல்நிலைப்பள்ளியின் பிளஸ்-2 மாணவர் ராஜூ 3-வது இடமும் பிடித்தனர். கல்லூரி மாணவ-மாணவிகளுக்கான பேச்சு போட்டியில் அரியலூர் அரசு கலை மற்றும் அறிவியல் கல்லூரியின் பி.எஸ்சி. (வேதியியல்) 3-ம் ஆண்டு மாணவி காவியா முதலிடமும், தத்தனூர் மீனாட்சி ராமசாமி கலை கல்லூரியின் பி.ஏ. தமிழ் 3-ம் ஆண்டு மாணவி பவித்ரா 2-வது இடமும், ஜெயங்கொண்டம் அரசு கலை கல்லூரியின் பி.ஏ. தமிழ் 2-ம் ஆண்டு மாணவி கனிமொழி 3-வது இடமும் பிடித்தனர். சிறப்பு பரிசுக்கு அழகாபுரம் அரசு மேல்நிலைப்பள்ளி 10-ம் வகுப்பு மாணவர் சூரியதரிசனும், பரணம் அரசு மேல்நிலைப்பள்ளி பிளஸ்-1 மாணவி தமிழ்இனியாவும் தேர்ந்தெடுக்கப்பட்டனர்.

போட்டியில் வெற்றி பெற்ற பள்ளி, கல்லூரி மாணவ-மாணவிகளுக்கு தனித்தனியாக மாவட்ட அளவில் முதல் பரிசாக ரூ.5 ஆயிரமும், 2-ம் பரிசாக ரூ.3 ஆயிரமும், 3-ம் பரிசாக ரூ.2 ஆயிரமும் மற்றும் பாராட்டு சான்றிதழும், மாவட்ட கலெக்டரால் விரைவில் வழங்கப்படவுள்ளது. மேலும் பள்ளி மாணவ-மாணவிகளுக்கு நடத்தப்பட்ட பேச்சு போட்டியில் பங்கேற்றவர்களில், அரசு பள்ளி மாணவ-மாணவிகளில் 2 பேர் தனியாக தேர்வு செய்யப்பட்டுள்ளனர். அவர்கள் ஒவ்வொருவருக்கும் சிறப்பு பரிசு தொகையாக ரூ.2 ஆயிரம் வீதம் வழங்கப்படவுள்ளது என்று தமிழ் வளர்ச்சி துறையினர் தெரிவித்தனர்.