தினத்தந்தி புகார் பெட்டி

மார்த்தாண்டம்-குலசேகரம் சந்திப்பு சாலையில் உண்ணாமலைக்கடை பஸ் நிறுத்தம் உள்ளது. இந்த பஸ் நிறுத்தத்தின் எதிரே சாலையோரம் அமைக்கப்பட்டிருந்த பி.எஸ்.என்.எல் தகவல்தொடர்பு  நிறுவனத்தின் கம்பம் ஒன்று சேதமடைந்து முறிந்து விழும் நிலையில் இருந்தது. இதுபற்றி ‘தினத்தந்தி’ புகார் பெட்டியில் செய்தி வெளியிடப்பட்டது. இதையடுத்து சேதமடைந்த கம்பத்தை சம்பந்தப்பட்ட அதிகாரிகள் நடவடிக்கை எடுத்து அகற்றினர். செய்தியை வெளியிட்ட தினத்தந்திக்கும், நடவடிக்கை எடுத்த அதிகாரிகளுக்கும் அந்த பகுதி மக்கள் நன்றியை தெரிவித்தனர்.

அழகியபாண்டியபுரம் பேரூராட்சிக்கு உட்பட்ட பிளவக்கல்விளை  9-வது வார்டுக்கு உட்பட்ட பகுதியில் முறையாக வடிகால் ஓடை அமைக்கப்படாமல் உள்ளது. மழை காலங்களில் தண்ணீர் தேங்கி, கொசுக்கள் உற்பத்தியாகி தொற்றுநோய் பரவும் அபாயம் ஏற்பட்டுள்ளது.  இதனால், அந்த பகுதி மக்கள் பெரும் அவதிக்குள்ளாகி வருகிறார்கள். எனவே, மழைநீர் வடிந்தோட வடிகால் ஓடை அமைக்க சம்பந்தப்பட்ட அதிகாரிகள் நடவடிக்கை எடுக்க வேண்டும். 

                        -பிராங்கிளின் கனிஷ்குமார், எட்டாமடை.