குமரி மாவட்டத்தில் கோடை மழையால் தேன் உற்பத்தி பாதிப்பு

இதுகுறித்து குலசேகரம் கொச்சுவீட்டுப்பாறை பகுதியை சேர்ந்த தேனீ வளர்ப்பாளர் தோமஸ் கூறியதாவது:-

நடப்பாண்டில் சீசன் காலத்தில் பெய்து வரும் மழையால் பெரும் இழப்பு ஏற்பட்டு வருகிறது. பொதுவாக ஒரு தேன் பெட்டியிலுள்ள தேனீக்களுக்கு சீசன் இல்லாத 9 மாதங்களுக்கு 8 கிலோ சர்க்கரைப்பாகு உணவாக கொடுக்க வேண்டும். இதற்கு குறைந்தபட்சம் ரூ.320 செலவாகும். இது தவிர வாரம் தோறும் பெட்டி பராமரிப்பு, தேனை பதப்படுத்துதல், தொழிலாளர் கூலி என பல்வேறு செலவினங்கள் உள்ளன. குறைந்தபட்சம் 1 பெட்டியிலிருந்து ஆண்டுக்கு 7 கிலோ தேன் கிடைக்க வேண்டும். நடப்பாண்டில் 1 பெட்டியிலிருந்து சராசரியாக 1½ கிலோ தேன் மட்டுமே கிடைத்துள்ளது. தற்போது தேன் உற்பத்தியாளர் கூட்டுறவு சங்கங்கள் மற்றும் மொத்தமாக கொள்முதல் செய்பவர்கள் கிலோவிற்கு ரூ.150 என்ற அளவிலேயே கொள்முதல் செய்கின்றனர். தேனுக்கு கிடைக்கும் விலை உற்பத்தி செலவுக்கு கூட போதுமானதாக இல்லாததால் தேனீ வளர்ப்போருக்கு பெரும் இழப்பு ஏற்பட்டுள்ளது.

 எனவே தமிழக அரசின் தோட்டக்கலை துறை தேனீ வளர்ப்போரின் துயர் துடைக்கும் வகையில் தேன் கூடுகளை பார்வையிட்டு உரிய நிவாரணம் கிடைக்கவும், கொள்முதல் விலையை ரூ.250 ஆக உயர்த்தவும் நடவடிக்கை எடுக்க வேண்டும். 

மேலும், மாநில அரசு தேனீ வளர்ப்பு தொழிலுக்கு வழங்கும் நிதிகள் உண்மையான தேனீ வளர்ப்போருக்கு கிடைக்க வேண்டும்.

இவ்வாறு அவர் கூறினார்.

ஆண்டுக்கடன் 

 குமரி மாவட்ட தேன் சேகரிப்போர் சங்க செயலாளர் ஜூடஸ்குமார் கூறியதாவது:- 

கடந்த 3 ஆண்டுகளாக சீசன் காலத்தில் பெய்து வரும் தொடர் மழை மற்றும் தேனீக்களுக்கு ஏற்படும் நோய் தாக்குதல் காரணமாக போதிய அளவில் தேன் கிடைக்காமல் தேனீ வளர்ப்போர் பெரும் இழப்பிற்கு ஆளாகி வருகின்றனர். எனவே, தேனீ வளர்போருக்கு உரிய நிவாரணம் கிடைக்க அரசு முன்வர வேண்டும்.

 மேலும், திருவட்டார் தாலுகா தேனீ வளர்ப்போரை, மார்த்தாண்டம் தேனீ வளர்ப்போர் கூட்டுறவு சங்கத்தில் இணைத்து அவர்களின் தேனை கொள்முதல் செய்வதுடன், அரசின் நலத்திட்டங்களை பெற்றுக்கொடுக்க வேண்டும். தேனீ வளர்ப்போருக்கு கூட்டுறவு சங்கங்கள் மூலம் ஆண்டு கடன் வழங்கி அதற்கு ஈடாக தேனை கொள்முதல் செய்யவும், கூட்டுறவு சங்கங்கள் மூலம் தேனீ வளர்ப்போருக்கு மலிவு விலையில் சர்க்கரை வழங்க வேண்டும்.

இவ்வாறு அவர் கூறினார்.