தேசிய நெடுஞ்சாலை தடுப்பு சுவரில் கார் மோதி தலைகுப்புற கவிழ்ந்தது. தந்தை, மகன் உயிர்த்தப்பினர்
தேசிய நெடுஞ்சாலை தடுப்பு சுவரில் கார் மோதி தலைகுப்புற கவிழ்ந்தது. இதில் தந்தை, மகன் உயிர்த்தப்பினர்.
அணைக்கட்டு
சென்னை சோமங்கலம் செங்குந்தர் தெருவை சேர்ந்தவர் சங்கரலிங்கம் (வயது 42). இவர் தனது 7 வயது மகனுடன் ஆம்பூரை நோக்கி காரில் சென்று கொண்டிருந்தார். பள்ளிகொண்டாவை அடுத்த அகரம்சேரி எஸ்.என்.பாளையம் பகுதியில் தேசிய நெடுஞ்சாலையில் உள்ள வளைவில் சென்றபோது கார் திடீரென கட்டுப்பாட்டை இழந்து சாலையின் நடுவில் உள்ள தடுப்பு சுவரில் மோதி தலைகுப்புற கவிழ்ந்தது.
இந்த விபத்தில் காரில் சென்ற சங்கரலிங்கம் மற்றும் அவரது மகன் மயிரிழையில் உயிர் தப்பினர். விபத்து நடந்த சத்தம் கேட்டவுடன் அங்கிருந்த பொதுமக்கள் உடனடியாக அவர்களை காரில் இருந்து மீட்டு சிகிச்சைக்காக வேலூர் அரசு மருத்துவமனைக்கு அனுப்பி வைத்தனர். தகவல் அறிந்ததும் பள்ளிகொண்டா போலீசார் சம்பவ இடத்திற்கு விரைந்து வந்து காரை மீட்டு விசாரணை நடத்தி வருகின்றனர்.