வாலிபரை கட்டையால் தாக்கியவர் கைது

விராலிமலை ஒன்றியம், தொண்டைமான் நல்லூரை சேர்ந்தவர் செல்வம் (வயது 46). இவரது மகன் மகேஷ்(19). பிளம்பர் வேலை பார்த்து வரும் இவருக்கும், மண்டையூரை சேர்ந்த விஜயகுமார் மகன் ஜெயப்பிரகாஷ் (20) என்பவருக்கும் இடையே அப்பகுதியில் உள்ள குளத்தில் மீன் பிடிப்பது தொடர்பாக தகராறு இருந்து வந்துள்ளது. இந்தநிலையில் நேற்று காலை மகேஷ், தொண்டைமான் நல்லூர் கோவில் அருகே நின்று கொண்டிருந்தார். அப்போது அங்கு வந்த ஜெயப்பிரகாஷ், மகேசிடம் தகராறு செய்ததுடன் கட்டையால் அவரது தலையில் அடித்துள்ளார். இதில் பலத்த காயமடைந்த மகேஷ், கீரனூர் அரசு மருத்துவமனையில் அனுமதிக்கப்பட்டு சிகிச்சை பெற்று வருகிறார். இதுகுறித்த புகாரின்பேரில் மாத்தூர் போலீசார் வழக்குப்பதிவு செய்து ஜெயப்பிரகாசை கைது செய்தனர்.