ஈரோடு பெரிய மாரியம்மன் கோவில் அருகில் அமைக்கப்பட்டு இருந்த பந்தல் மீது லாரி மோதியதால் பரபரப்பு

ஈரோடு

ஈரோடு மாநகர் பகுதியில் மிகவும் பிரசித்தி பெற்ற கோவிலாக பெரிய மாரியம்மன் கோவில் உள்ளது. இந்த கோவில் விழா கடந்த 15-ந்தேதி பூச்சாட்டுதலுடன் தொடங்கியது. கடந்த 19-ந்தேதி கோவில் முன்பு கம்பம் நடப்பட்டது. இந்த கம்பத்துக்கு தினந்தோறும் ஏராளமானோர் புனிதநீர் ஊற்றி அம்மனை வழிபட்டு வருகிறார்கள்.

இந்த நிலையில் நேற்றும் ஏராளமான பக்தர்கள் நீண்ட வரிசையில் காத்திருந்து புனிதநீர் ஊற்றிச்சென்றனர். இரவு 8 மணி வரை கோவிலில் பக்தர்கள் கூட்டம் அதிகமாக இருந்தது. அதைத்தொடர்ந்து பக்தர்கள் கூட்டம் குறைய தொடங்கியது. இதற்கிடையில் வெள்ளாங்கோவில் பகுதியில் இருந்து ஜவுளி பாரம் ஏற்றிக்கொண்டு மாராட்டிய மாநிலத்துக்கு லாரி ஒன்று புறப்பட்டது. இந்த லாரி இரவு 10 மணி அளவில் பன்னீர்செல்வம் பூங்கா பகுதியில் இருந்து மீனாட்சி சுந்தரனார் ரோட்டில் சென்று கொண்டிருந்தது. அப்போது எதிர்பாராத விதமாக டிரைவரின் கட்டுப்பாட்டை இழந்து பெரியமாரியம்மன் கோவில் அருகே கடைகள் முன்பு போடப்பட்டு இருந்த பந்தல் மீது மோதியது. இதில் தகரத்தால் அமைக்கப்பட்டு இருந்த மேற்கூரை சரிந்து லாரி மேல் விழுந்தது. நல்ல வேலையாக அப்போது கோவிலில் பக்தர்கள் யாரும் இல்லை. இதனால் பெரும் விபத்து தவிர்க்கப்பட்டது. இதைத்தொடர்ந்து தொழிலாளர்கள் விரைந்து வந்து பந்தலை சரிசெய்யும் பணியில் ஈடுபட்டனர். இந்த சம்பவத்தால் ஈரோடு பெரிய மாரியம்மன் கோவில் பகுதியில் நேற்று இரவில் பரபரப்பு ஏற்பட்டது.