வெவ்வேறு விபத்துக்களில் ராணுவ வீரர், மாணவர் பலி
மதுரையில் நடந்த வெவ்வேறு விபத்துக்களில் ராணுவ வீரர், மாணவர் பலியானார்கள்.
மதுரை,
மதுரையில் நடந்த வெவ்வேறு விபத்துக்களில் ராணுவ வீரர், மாணவர் பலியானார்கள்.
பிளஸ்-1 மாணவர் பலி
மதுரை நிலையூர் கைத்தறி நகரைச் சேர்ந்தவர் பாண்டியராஜன். இவருடைய மகன் நவநீதிராஜன் (வயது 17). மதுரையில் உள்ள பள்ளியில் பிளஸ்-1 படித்து வந்தார். இவர் கைத்தறி நகரில் இருந்து பெருங்குடி நோக்கி நேற்று மோட்டார் சைக்கிளில் சென்று கொண்டிருந்தார். அப்போது பெருங்குடியில் இருந்து கைத்தறிநகர் நோக்கி கார் ஒன்று வந்துள்ளது. பி.ஆர்.பி. தோட்டம் அருகே வந்தபோது கார் மற்றும் மோட்டார் சைக்கிள் நேருக்குநேர் மோதியதில், நவநீதிராஜன் சம்பவ இடத்திலேயே உயிரிழந்தார். இதுகுறித்து பெருங்குடி போலீசார் வழக்குப்பதிவு செய்து விசாரிக்கின்றனர்.
ராணுவ வீரர் சாவு
இதேபோல திருமங்கலம் தாலுகா டி.ராமநாதபுரம் பகுதியைச் சேர்ந்த சிவக்குமார் மகன் கணேஷ்குமார் (25). இவர் ராணுவத்தில் பணிபுரிந்து வந்தார். தற்போது விடுமுறையில் ஊருக்கு வந்த இவர் பாண்டிகோவிலில் சாமி தரிசனம் செய்துவிட்டு நண்பருடைய இருசக்கர வாகனத்தில் பின்னால் அமர்ந்து வந்தார். பாரம்புபட்டி அருகே வந்தபோது வாகனம் நிலைதடுமாறி விழுந்ததில் கணேஷ்குமார் கீழே விழுந்தார். படுகாயமடைந்த அவரை அக்கம்பக்கத்தினர் மீட்டு அரசு ஆஸ்பத்திரிக்கு கொண்டு சென்றனர். ஆனால் ஆஸ்பத்திரிக்கு செல்லும் வழியிலேயே அவர் பரிதாபமாக உயிரிழந்தார். இதுகுறித்து போலீசார் வழக்குப்பதிவு செய்து விசாரித்து வருகின்றனர்.