தோட்டக்கலை பயிர் சாகுபடியில் சிறந்து விளங்கும் விவசாயிகளுக்கு பரிசு. கலெக்டர் பாஸ்கர பாண்டியன் அறிவிப்பு
தோட்டக்கலை பயிர் சாகுபடியில் சிறந்து விளங்கும் விவசாயிகளுக்கு பரிசு வழங்கப்படும் என கலெக்டர் பாஸ்கர பாண்டியன் தெரிவித்துள்ளார்.
ராணிப்பேட்டை
ராணிப்பேட்டை மாவட்ட கலெக்டர் பாஸ்கர பாண்டியன் வெளியிட்டுள்ள செய்திக்குறிப்பில் கூறப்பட்டு இருப்பதாவது:-
ராணிப்பேட்டை மாவட்டத்தில் தரிசு நிலங்களில் தோட்டக்கலை பயிர்கள் சாகுபடியில் சிறந்து விளங்கும் விவசாயிகளுக்கு தோட்டக்கலை மற்றும் மலைப்பயிர்கள் துறையின் சார்பில் ரொக்கப் பரிசு வழங்கப்பட உள்ளது. மாவட்ட அளவில் முதல் பரிசாக ரூ.15 ஆயிரம், இரண்டாவது பரிசாக ரூ.10 ஆயிரம், மூன்றாவது பரிசாக ரூ.5 ஆயிரம் வழங்கப்பட உள்ளது.
ராணிப்பேட்டை மாவட்டத்தில் வசிக்கும் சொந்த நிலம் வைத்திருக்கும் அனைத்து தோட்டக்கலை பயிர் சாகுபடி செய்கின்றவர்கள் இதில் பங்கு பெறலாம். விவசாயிகள் www.tnhorticulture.tn.gov.in என்ற இணையதளத்தில் இருந்து விண்ணப்பத்தை பதிவிறக்கம் செய்து, பூர்த்தி செய்யப்பட்ட விண்ணப்பத்தை அந்தந்த வட்டார தோட்டக்கலை உதவி இயக்குனர் அலுவலகத்தில் வருகிற 23-ந் தேதிக்குள் சமர்ப்பிக்க வேண்டும்.
மேலும் இது தொடர்பான விவரங்களை அறிய அந்தந்த தோட்டக்கலை உதவி இயக்குனர்களை தொடர்பு கொள்ளலாம்.
இவ்வாறு அதில் கூறப்பட்டுள்ளது.