குளித்தலையில், தெப்ப உற்சவம்

கரூர் மாவட்டம் குளித்தலை நகராட்சிக்குட்பட்ட பரிசல்துறை சாலையில் ரெயில் நிலையம் அருகே அய்யர்மலை ரெத்தினகிரீசுவரர் கோவிலுக்கு சொந்தமான தெப்பக்குளம் உள்ளது. இந்த தெப்பக்குளத்தில் ஆண்டுதோறும் பங்குனி உத்திரத்தையொட்டி அய்யர்மலையில் உள்ள ரெத்தினகிரீசுவரர் கோவிலில் இருந்து சாமி கொண்டுவரப்பட்டு தெப்ப உற்சவ விழா நடத்தப்படுவது வழக்கம். 

கடந்த 1986-ம் ஆண்டுக்கு பிறகு இங்கு தெப்ப உற்சவம் நடைபெறவில்லை. இதையடுத்து 36 ஆண்டுகளுக்கு பிறகு கடந்த 2018-ம் ஆண்டு இங்கு தெப்ப உற்சவம் நடத்தப்பட்டது. கடந்த 2020-ம் ஆண்டு மட்டும் கொரோனா ஊரடங்கு காரணமாக தெப்ப உற்சவம் நடத்தப்படவில்லை. இதையடுத்து இந்த ஆண்டு பங்குனி உத்திரத்தையொட்டி தெப்ப உற்சவம் நடத்த ஏற்பாடு செய்யப்பட்டது. 

தெப்ப உற்சவ விழாவையொட்டி நேற்று அய்யர்மலையில் உள்ள ரெத்தினகிரீசுவரர் கோவிலில் இருந்து குளித்தலை பகுதிக்கு சாமி கொண்டுவரப்பட்டு அங்கு சிறப்பு அபிஷேக, ஆராதணைகள் நடைபெற்றது. பின்னர் சிறப்பு அலங்காரம் செய்யப்பட்ட சாமிகள் தங்க குதிரை வாகனத்தில் புறப்பட்டு குளித்தலை கடம்பவனேசுவரர் கோவிலுக்கு கொண்டுவரப்பட்டது. அங்கு ரெத்தினகிரீசுவரர் சாமிக்கு குளித்தலை கடம்பவனேசுவரர் சுவாமி ரிஷப வாகனத்தில் எழுந்தருளி சந்திப்பு கொடுத்தார். இதனையடுத்து ரெத்தினகிரீசுவரர் சாமி நகரின் முக்கிய வீதிகள் வழியாக கொண்டுவரப்பட்டு தெப்பக்குளத்தை வந்தடைந்தது. அங்கு அமைக்கப்பட்டிருந்த தெப்பத்தில் சாமிஎழுந்தருளி பக்தர்களுக்கு காட்சியளித்தார். 

இதனை தொடர்ந்து தெப்பகுளத்தில் சாமிகள் சுற்றிவந்து தெப்ப உற்சவம் நடைபெற்றது. அப்போது தெப்பக்குளத்தின் நடுவில் அமைந்துள்ள மண்டபத்தில் சாமிகளுக்கு சிறப்பு பூஜைகள் நடத்தப்பட்டு, சாமி ஊஞ்சல் ஆடும் நிகழ்ச்சி நடைபெற்றது. 

இந்த மண்டபத்தில் இருந்து மீண்டும் சாமிகள் கொண்டுவரப்பட்டு தெப்பகுளக்கரையில் வைக்கப்பட்டது. அப்போது பொதுமக்கள் பலர் சாமிக்கு சிறப்பு அர்ச்சனை செய்து வழிபட்டனர். இந்த தெப்ப உற்சவத்தைகான திரளான பொதுமக்கள் வந்திருந்து சாமி தரிசனம் செய்தனர். இந்த தெப்ப உற்சவம் விழாவுக்கான ஏற்பாட்டினை அய்யர்மலை கோவில் நிர்வாகம் மற்றும் தெப்பத் திருவிழா விழா குழுவினர் செய்திருந்தனர்.