வடமாநில சுற்றுலா பயணிகள் உள்பட 7 பேர் காயம்

சின்னமனூர்:

மேற்கு வங்காள மாநிலத்தை சேர்ந்தவர் சந்திப்பிரானு (வயது 44). இவர், தனது குடும்பத்தினர் 6 பேருடன், தேனி மாவட்டம் மேகமலைக்கு காரில் நேற்று காலை சுற்றுலா  வந்தார். மேகமலையில் உள்ள சுற்றுலா இடங்களை சந்திப்பிரானு மற்றும் அவருடைய குடும்பத்தினர் பார்த்து ரசித்து விட்டு சின்னமனூர் நோக்கி காரில் திரும்பி கொண்டிருந்தனர். அந்த காரை, மதுரையை சேர்ந்த நாகராஜ் என்பவர் ஓட்டினார். மலைப்பாதையில், 3-வது வளைவில் உள்ள தென்பழனி வனத்துறை சோதனைச்சாவடி அருகே கார் வந்து கொண்டிருந்தது. 

அப்போது திடீரென டிரைவரின் கட்டுப்பாட்டை இழந்த கார், சாலையோர தடுப்பு சுவரில் மோதி விபத்துக்குள்ளானது. இதில் டிரைவர் உள்பட 7 பேர் படுகாயம் அடைந்தனர். அக்கம்பக்கத்தினர் அவர்களை மீட்டு சிகிச்சைக்காக சின்னமனூர் அரசு மருத்துவமனைக்கு அனுப்பி வைத்தனர்.

 சந்திப்பிரானு, மாணிக் பாஸ்கர் (55), சவுரன்யராணி (38) ஆகியோர் மேல்சிகிச்சைக்காக தேனி அரசு மருத்துவ கல்லூரி மருத்துவமனைக்கு சிகிச்சைக்காக அனுமதிக்கப்பட்டனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. 

இதுகுறித்து ஹைவேவிஸ் போலீசார் வழக்குப்பதிவு செய்து விசாரணை நடத்தி வருகின்றனர்.