3 ஆயிரம் மூட்டைகள் பருத்தி ரூ.1 கோடிக்கு ஏலம்

ராசிபுரம்:-

ராசிபுரத்தில் 3 ஆயிரத்து 30 மூட்டைகள் பருத்தி ரூ.1 கோடிக்கு ஏலம் போனது.

ராசிபுரம் வேளாண் உற்பத்தியாளர் கூட்டுறவு சங்க கிளை வளாகத்தில் நேற்று பருத்தி ஏலம் நடந்தது. முத்துக்காளிப்பட்டி, மசக்காளிபட்டி, கவுண்டம்பாளையம், சந்திரசேகரபுரம், அணைப்பாளையம், பாச்சல், மின்னக்கல், சிங்களாந்தபுரம், முருங்கபட்டி, குருசாமி பாளையம், அம்மாபாளையம் உள்ளிட்ட பல்வேறு இடங்களில் இருந்து பருத்தியை விவசாயிகள் ஏலத்திற்கு கொண்டு வந்து இருந்தனர்.

இந்த ஏலத்தில் சேலம், ஆத்தூர், ராசிபுரம், திருப்பூர், கோவை, பல்லடம் உள்ளிட்ட பல இடங்களில் இருந்து வியாபாரிகள் கலந்து கொண்டனர். 3 ஆயிரத்து 30 பருத்தி மூட்டைகள் ரூ.1 கோடியே 4 லட்சத்திற்கு ஏலம் விடப்பட்டது.

இந்த ஏலத்தில் ஆர்.சி்.எச். ரக பருத்தி 2 ஆயிரத்து 830 மூட்டைகளும், டி.சி.எச். ரக பருத்தி மூட்டைகள் 130 மூட்டைகளும், கொட்டு பருத்தி 70 மூட்டைகளும் கொண்டு வரப்பட்டு இருந்தன.

இதில் ஆர்.சி.எச். ரக பருத்தி ஒரு குவிண்டால் குறைந்தபட்சம் ரூ.9 ஆயிரத்து 799-க்கும், அதிகபட்சமாக ஒரு குவிண்டால் ரூ.10 ஆயிரத்து 616-க்கும், டி.சி.எச். ரக பருத்தி ஒரு குவிண்டால் குறைந்தபட்சமாக ரூ.9 ஆயிரத்து 739 முதல் அதிகபட்சமாக ஒரு குவிண்டால் ரூ.11 ஆயிரத்து 889-க்கும், கொட்டு ரக பருத்தி ஒரு குவிண்டால் குறைந்தபட்சம் ரூ.4 ஆயிரத்து 650 முதல் அதிகப்பட்சமாக ரூ.6 ஆயிரத்து 500-க்கும் ஏலம் விடப்பட்டது.