மோட்டார் சைக்கிளில் இருந்து கீழே விழுந்த மாட்டு வியாபாரி பலி
நெகமம் அருகே மோட்டார் சைக்கிளில் இருந்து கீழே விழுந்த மாட்டு வியாபாரி பரிதாபமாக உயிரிழந்தார்.
நெகமம்
நெகமம் அருகே உள்ள கொல்லபட்டியை சேர்ந்தவர் ராஜேஷ் (வயது 32). மாட்டு வியாபாரி. இவருக்கு திருமணம் ஆகி 2 குழந்தைகள் உள்ளனர். இவர் நேற்று முன்தினம் தாராபுரம் அருகில் உள்ள குண்டடம் சந்தைக்கு சென்று விட்டு, தனது மோட்டார் சைக்கிளில் கொல்லபட்டிக்கு வந்து கொண்டிருந்தார். அப்போது ஜி.காளியாபுரம் அருகில் உள்ள வேலப்பர் கோவில் அருகே வந்தபோது நிலைதடுமாறி மோட்டார் சைக்கிளில் இருந்து கீழே விழுந்தார். இதில் தலையில் பலத்த காயம் அடைந்த அவரை அருகில் இருந்தவர்கள் மீட்டு 108 ஆம்புலன்ஸ் மூலம் பொள்ளாச்சி அரசு மருத்துவமனைக்கு கொண்டு சென்றனர். அங்கு அவரை பரிசோதனை செய்த டாக்டர்கள் ஏற்கனவே ராஜேஷ் இறந்து விட்டதாக தெரிவித்தனர். இது குறித்து நெகமம் போலீசார் வழக்குப்பதிவு செய்து விசாரணை நடத்தி வருகின்றனர்.