கால்நடைகளுக்கு சிறப்பு மருத்துவ முகாம்
கொள்ளிடம் அருகே கால்நடைகளுக்கு சிறப்பு மருத்துவ முகாம் நடைபெற்றது.
கொள்ளிடம்:
கொள்ளிடம் அருகே ஓதவந்தான்குடி கிராமத்தில் கோமாரி நோய் தடுப்பு மற்றும் கால்நடை சுகாதார விழிப்புணர்வு முகாம் நடந்தது. இதில் ஓதவந்தான்குடி, அகரவட்டாரம், மாதானம், ஆர்ப்பாக்கம், பச்சை பெருமாநல்லூர் உள்ளிட்ட 10-க்கும் மேற்பட்ட கிராமங்களை சேர்ந்த மாடுகள், ஆடுகள், கோழி, நாய் உள்ளிட்டவைகளுக்கு சிறப்பு பரிசோதனை மற்றும் தடுப்பூசி செலுத்தப்பட்டது. குறிப்பாக மாடுகளுக்கு கோமாரி நோய் தடுப்பூசி போடப்பட்டது. பசு மற்றும் எருமை மாடுகளுக்கு செயற்கை கருவூட்டல் ஊசி மற்றும் பரிசோதனை செய்யப்பட்டது. ஆடுகளுக்கு குடற்புழு நீக்கம், கோழிகளுக்கு வெள்ளை கழிச்சல் தடுப்பூசி உள்ளிட்ட சிகிச்சைகள் அளிக்கப்பட்டது. மேலும் கால்நடை வளர்ப்பு குறித்து விழிப்புணர்வு துண்டு பிரசுரங்கள் வழங்கப்பட்டது சிறப்பாக மாடு வளர்ப்பில் ஈடுபட்ட விவசாயிகளுக்கு பரிசுகள் வழங்கப்பட்டது. தற்போது பெய்த பருவம் தவறிய மழையால் கால்நடைகள் கோமாரி நோய் உள்ளிட்ட பல்வேறு நோய் பாதிப்புக்கு ஆளாகி வரும் நிலையில் இந்த பகுதியில் நடைபெற்ற மருத்துவ முகாம் விவசாயிகளுக்கும் கால்நடைகளுக்கும் மிகவும் பயனுள்ளதாக அமைந்ததாக அந்த பகுதி விவசாயிகள் கூறினர். முகாமில் ஊராட்சி மன்ற தலைவர் சிவகுமார், கால்நடை டாக்டர்கள் ராமபிரபா, மணிமொழி, சரவணன், கால்நடை ஆய்வாளர், கால்நடை பராமரிப்பு உதவியாளர்கள் உள்பட 20-க்கும் மேற்பட்ட அலுவலர்கள் முகாமில் கலந்து கொண்டு கால்நடைகளுக்கு தொடர் சிகிச்சை அளித்தனர். மேலும் இந்த சிறப்பு முகாமில் மீன்வளத்துறை சார்பாக கலந்து கொண்டு விவசாயிகளுக்கு மீன் இறால் வளர்ப்பு குறித்து விழிப்புணர்வு அளிக்கப்பட்டது.