சிக்கராயபுரம் கல்குவாரி குட்டையில் டன் கணக்கில் கொட்டப்படும் குப்பைகள்

காஞ்சீபுரம் மாவட்டம், குன்றத்தூர் ஒன்றியத்திற்குட்பட்ட சிக்கராயபுரம் பகுதியில் கல்குவாரி குட்டைகள் உள்ளது. இங்கு கடந்த சில ஆண்டுகளுக்கு முன்பு சென்னையில் ஏற்பட்ட குடிநீர் தட்டுப்பாட்டை போக்க ராட்சத மோட்டார்கள் மூலம் தண்ணீர் எடுக்கப்பட்டு பொதுமக்களுக்கு வழங்கப்பட்டு வந்தது. இதனால் சிக்கராயபுரம் கல்குவாரி குட்டைகளை ஒருங்கிணைத்து மிகப்பெரிய நீர் தேக்கமாக மாற்றுவதற்கான முயற்சிகள் மேற்கொள்ளப்பட்டு வருகிறது.

இந்த நிலையில் சிக்கராயபுரம் ஊராட்சியில் சேகரிக்கப்படும் குப்பைகள் அங்கு உள்ள சுடுகாட்டில் டன் கணக்கில் கொட்டி வைக்கப்பட்டுள்ளது. இதையடுத்து அங்கு உள்ள குப்பைகள் லாரி மூலம் எடுக்கப்பட்டு சிக்கராயபுரம் கல்குவாரியில் டன் கணக்கில் கொட்டிப்பட்டு வருகிறது.

மேலும் குப்பை கொட்டிய தடம் தெரியாமல் இருப்பதற்காக கொட்டப்பட்ட குப்பைகளின் மீது மண்ணை கொட்டி மூடி வருவதால் அங்கு நிலத்தடி நீர் பாதிக்கும் சூழ்நிலை உருவாகி உள்ளது. இதனால் சென்னை மக்களுக்கு குடிநீர் வழங்குவதில் சிரமம் ஏற்படும். நீர்நிலைகளைப் பாதுகாக்க ஐகோர்ட்டு உத்தரவிட்டுள்ள நிலையில் ஊராட்சி நிர்வாகம் நீர் நிலைகளில் குப்பைகளை கொட்டி வருவது பொதுமக்களிடையே பெரும் அதிர்ச்சியை ஏற்படுத்தி உள்ளது.