சிறுமிக்கு கட்டாய திருமணம் ஆட்டோ டிரைவர் போக்சோவில் கைது

போடி:

போடி அருகே உள்ள குச்சனூர் துரைச்சாமிபுரம் மேலத்தெருவை சேர்ந்த முத்துராஜ் மகன் தங்கபரமானந்தம் (வயது 25). ஆட்டோ டிரைவர். இவர் 16 வயது சிறுமியை கடந்த ஆண்டு மே மாதம் திருமணம் செய்து கொண்டார். இந்தநிலையில் அந்த சிறுமிக்கு நேற்று முன்தினம் தேனி அரசு மருத்துவ கல்லூரி மருத்துவமனையில் அழகான ஆண் குழந்தை பிறந்தது. 

இதனிடையே சிறுமிக்கு குழந்தை பிறந்தது குறித்து தேனி அரசு மருத்துவ கல்லூரி மருத்துவமனை போலீசில் இருந்து போடி அனைத்து மகளிர் போலீஸ் நிலையத்துக்கு தகவல் தெரிவிக்கப்பட்டது. அதன்பேரில் போடி மகளிர் போலீசார் மருத்துவமனைக்கு சென்று சிறுமியிடம் வாக்குமூலம் வாங்கினர். இதைத்தொடர்ந்து சிறுமியை கட்டாய திருமணம் செய்ததற்காக தங்கபரமானந்தம் மீது போக்சோ சட்டத்தின் கீழ் போலீசார் வழக்கு பதிவு செய்து அவரை கைது செய்தனர். மேலும் இதுதொடர்பாக சிறுமியின் பெற்றோர் மீதும் போலீசார் வழக்குப்பதிவு செய்து விசாரணை நடத்தி வருகின்றனர்.