வள்ளியூர் அருகே வாழை மரங்கள் வெட்டி சாய்ப்பு

வள்ளியூர்:

வள்ளியூர் அருகே உள்ள ராமகிருஷ்ணாபுரத்தைச் சேர்ந்தவர் பாஸ்கர் (வயது 50). விவசாயி. இவர் ராமகிருஷ்ணாபுரம் ஊருக்கு மேற்கே கோவில் இடத்தை குத்தகைக்கு எடுத்து விவசாயம் செய்து வருகிறார். இவரது தோட்டத்தில் 8 ஆயிரம் வாழைகள் பயரிட்டுள்ளார்.

இந்நிலையில் நேற்று முன்தினம் இரவு மர்ம நபர்கள் அவரது தோட்டத்திற்குள் புகுந்து 5 மாதமான சுமார் 500-க்கும் மேற்பட்ட வாழை மரங்களை அரிவாளால் வெட்டி சாய்த்துள்ளனர். வழக்கம் போல் நேற்று காலையில் தோட்டத்திற்கு போன பாஸ்கர், வாழை மரங்கள் வெட்டப்பட்டு கிடந்ததை பார்த்து அதிர்ச்சி அடைந்தார். இதுகுறித்த புகாரின் பேரில் வள்ளியூர் போலீஸ் இன்ஸ்பெக்டர் சாகுல் ஹமீது வழக்குப்பதிவு செய்து விசாரணை நடத்தி வருகிறார்.