தினத்தந்தி புகார் பெட்டி

சேலம் மாநகராட்சி சூரமங்கலம் மண்டலம் 22-வது கோட்டத்தில் ஆண்டிப்பட்டி உள்ளது. இந்த ஊரின் மைய பகுதியில் 4 சாலைகள் சந்திக்கும் இடம் உள்ளது. இந்த வழியாகத்தான் இரு சக்கர வாகனங்கள், நான்கு சக்கர வாகனங்கள் ஏராளமாக சென்று வருகின்றன. 4 சாலைகளையும் சந்திக்கும் இடத்தில் வளையில் சாக்கடை கால்வாய் சேதமடைந்து காணப்படுகிறது. இதனால் அந்த வழியாக செல்லும் இருசக்கர வாகனங்கள், 4 சக்கர வாகனங்கள் அடிக்கடி விபத்தில் சிக்குகின்றன. அப்படி விபத்து ஏற்படும் போது காயம் அடைந்து செல்பவர்களும் ஏராளம். இதுதொடர்பாக மாநகராட்சி சூரமங்கலம் மண்டல அதிகாரிகளிடம் முறையிட்டும் எந்தவொரு பயனும் இல்லை. எனவே இதுதொடர்பாக மாநகராட்சி ஆணையாளர் நேரடியாக கவனம் செலுத்தி விபத்தை ஏற்படுத்தும் இந்த சாக்கடை கால்வாயை சரிசெய்ய வேண்டும்.

எ.கிதியோன், ஆண்டிப்பட்டி, சேலம்.

சேலம் நாட்டாண்மை கழகம் கட்டிட வளாகத்தில் உள்ள அரசு அலுவலக கட்டிடத்தின் மேல் மரங்கள் வளர்ந்து நிற்கிறது. இதை சீர் செய்து சரியான முறையில் பராமரித்து வந்தால் இந்த பழங்கால கட்டிடங்கள் இன்னும் நீண்ட நாட்கள் செயல்பட்டு வரும். எனவே மாவட்ட கலெக்டர் இதுதொடர்பாக தனிக்கவனம் செலுத்தி நாட்டாண்மை கழக கட்டிடத்தின் மேல் உள்ள மரங்களை அகற்றி முறையாக பராமரிக்க வேண்டும்.

-விஜயராஜசோழன், அத்வைத ஆசிரமம் ரோடு, சேலம்.

சேலம் மாநகராட்சி 3-வது வார்டு பூசாரிகாடு பகுதியில் சாலையோரத்தில் குப்பைகள் குவிந்து கிடக்கிறது. இந்த குப்பைகளில் இருந்து துர்நாற்றம் வீசுவதுடன் கொசுத்தொல்லை அதிகரித்துவிட்டது. இதுபற்றி மாநகராட்சி அலுவலரிடம் புகார் கொடுத்தும் பலனில்லை. கொரோனா வைரஸ் பரவும் நிலையில் இப்படி குப்பைகள் அள்ளாமல் இருப்பது அப்பகுதி மக்கள் அச்சப்படுகிறார்கள். இதற்கு அதிகாரிகள் நடவடிக்கை எடுப்பார்களா?

-ஊர்பொதுமக்கள், ரெட்டியூர், சேலம்.