விவசாயிகளுக்கு பட்டா வழங்கும் சிறப்பு முகாம்

வத்தலக்குண்டு: 

வத்தலக்குண்டு ஊராட்சி ஒன்றியம் ரெங்கப்பநாயக்கன் பட்டியில் விவசாயிகள் மற்றும் பொதுமக்களுக்கு பட்டா வழங்குவது தொடர்பான சிறப்பு முகாம் நடந்தது. இதற்கு நிலக்கோட்டை தாசில்தார் தனுஷ்கோடி தலைமை தாங்கினார். துணை தாசில்தார் சரவணகுமார், வத்தலக்குண்டு ஊராட்சி ஒன்றியக்குழு துணை தலைவர் முத்து ஆகியோர் முன்னிலை வகித்தனர். ரெங்கப்ப நாயக்கன்பட்டி ஊராட்சி தலைவர் மொக்கையா அனைவரையும் வரவேற்றார்.

வத்தலக்குண்டு தி.மு.க. ஒன்றிய செயலாளர் முருகன் மனுதாரர்களுக்கு பட்டாக்களை வழங்கினார். முகாமில் விருவீடு வருவாய் ஆய்வாளர் நாகசுந்தரம், கிராம நிர்வாக அலுவலர் மாணிக்கமுத்து, ஊராட்சி தலைவர் ரமேஷ் உள்பட பலர் கலந்து கொண்டனர்.