உள்ளாட்சி தேர்தலில் வெற்றி பெற தி.மு.க.வினர் ஒற்றுமையுடன் பணியாற்ற வேண்டும்
உள்ளாட்சி தேர்தலில் வெற்றி பெற தி.மு.க.வினர் ஒற்றுமையுடன் பணியாற்ற வேண்டும் என்று பள்ளிக்கல்வித்துறை அமைச்சர் அன்பில் மகேஷ் பொய்யாமொழி வேண்டுகோள் விடுத்தார்.
தஞ்சாவூர்:
உள்ளாட்சி தேர்தலில் வெற்றி பெற தி.மு.க.வினர் ஒற்றுமையுடன் பணியாற்ற வேண்டும் என்று பள்ளிக்கல்வித்துறை அமைச்சர் அன்பில் மகேஷ் பொய்யாமொழி வேண்டுகோள் விடுத்தார்.
செயல்வீரர்கள் கூட்டம்
தஞ்சாவூர் வடக்கு, தெற்கு மத்திய மாவட்ட தி.மு.க. செயல் வீரர்கள் கூட்டம் தஞ்சையில் நேற்று நடைபெற்றது. கூட்டத்திற்கு பள்ளிக்கல்வித்துறை அமைச்சர் அன்பில் மகேஷ் பொய்யாமொழி தலைமை தாங்கினார்.
மாவட்ட செயலாளர்கள் கல்யாணசுந்தரம், ஏனாதி.பாலு, தி.மு.க. உயர்நிலை செயல்திட்டக்குழு உறுப்பினர் எஸ்.எஸ்.பழனிமாணிக்கம் எம்.பி., ராமலிங்கம் எம்.பி., அரசு தலைமை கொறடா கோவி.செழியன் ஆகியோர் முன்னிலை வகித்தனர். மத்திய மாவட்ட செயலாளர் துரை.சந்திரசேகரன் எம்.எல்.ஏ. வரவேற்றார்.
அமைச்சர் அன்பில்மகேஷ் பொய்யாமொழி பேச்சு
கூட்டத்தில் பள்ளிக்கல்வித்துறை அமைச்சர் அன்பில் மகேஷ் பொய்யாமொழி பேசியதாவது:-
நிர்வாகிகள் தேர்தலில் இரு அணியாகவும், பொதுத்தேர்தலில் ஒரே அணியாகவும் இருந்து பணியாற்றி வரும் தி.மு.க.வினர், விரைவில் நடைபெறவுள்ள நகராட்சி, பேரூராட்சி, மாநகராட்சி தேர்தலில் கடமை, கண்ணியம், கட்டுப்பாடுடன், ஒற்றுமையாக இருந்து செயல்பட வேண்டும்.
கடந்த சட்டசபை பொதுத் தேர்தலில் தஞ்சை மாவட்டத்தில் 8 தொகுதிகளில் 7 இடங்களில் வெற்றி பெற்றுள்ளோம். அதே போல் வரும் தேர்தலில் அனைத்து இடங்களிலும் வெற்றி பெற்று, அந்த வெற்றியை முதல்-அமைச்சர் மு.க.ஸ்டாலின் காலடியில் சமர்பிக்க வேண்டும்.
பழைய கணக்கு
எனக்கு பழைய கணக்கு ஒன்று உள்ளது, நாடாளுமன்றத் தேர்தலில் தஞ்சையில் அன்பிலார் நின்று தோல்வியடைந்தார். ஆனாலும் அவர் இங்குள்ள தி.மு.க.காரர்களிடம் பாசத்தை வாரி வழங்கி அவர்களிடம் வெற்றி பெற்றார். அதே போல் என்னையும் நீங்கள் அரவணைத்து பழைய கணக்கை தீர்க்க வேண்டும். திருச்சிகாரரான அன்பிலார் தஞ்சையில் தோல்வியடைந்தார், ஆனால் நாங்கள் தஞ்சையை சேர்ந்த எல்.கணேசனை திருச்சியில் வெற்றி பெற வைத்தோம்.
தேர்தலுக்கு முன்பிருந்த முனைப்பு தொண்டர்களுக்கு எப்போதும் இருக்க வேண்டும். தொண்டர்களுக்கு உரிய நேரத்தில் உரிய மரியாதையும், அரசின் அதிகாரமும் தலைவர் விரைவில் வழங்குவார். எனவே, தி.மு.க.வினர் உணர்வுப்பூர்வமாக கட்சிப் பணியாற்ற வேண்டும்.
இவ்வாறு அவர் கூறினார்.
கூட்டத்தில் எம்.எல்.ஏ.க்கள் சாக்கோட்டை அன்பழகன், அண்ணாதுரை, டி.கே.ஜி.நீலமேகம், அசோக்குமார், முன்னாள் எம்.எல்.ஏ. ராமச்சந்திரன், முன்னாள் மாவட்ட பொறுப்பாளர் து.செல்வம், முன்னாள் நகர்மன்ற தலைவர் இறைவன், கும்பகோணம் நகர செயலாளர் தமிழழகன் உள்ளிட்ட பலர் கலந்து கொண்டு பேசினர்.