டவுன் பஞ்சாயத்து முன்னாள் உறுப்பினர் படுகொலை

விஜயாப்புரா: விஜயாப்புரா மாவட்டத்தில் முன்விரோதத்தில் டவுன் பஞ்சாயத்து முன்னாள் உறுப்பினர் ஆயுதங்களால் தாக்கி படுகொலை செய்யப்பட்ட பயங்கரம் நடந்துள்ளது. தலைமறைவான மர்மநபர்களை போலீசார் வலைவீசி தேடிவருகிறார்கள்.

விஜயாப்புரா மாவட்டம் அல்மேல் போலீஸ் எல்லைக்கு உட்பட்ட பகுதியில் வசித்து வந்தவர் பிரதீப் என்டமானா. இவர், டவுன் பஞ்சாயத்து முன்னாள் உறுப்பினர் ஆவார். மேலும் பிரதீப் ரவுடி ஆவார். அவரது பெயர் அல்மேல் போலீஸ் நிலையத்தில் ரவுடி பட்டியலில் இடம் பெற்றுள்ளது. நேற்று முன்தினம் இரவு அல்மேல் பகுதியில் நடந்த ஒரு நிகழ்ச்சியில் கலந்துகொள்ள பிரதீப் சென்றிருந்தார். நிகழ்ச்சியில் கலந்துகொண்டு விட்டு தனது நண்பர்களுடன் அவர் வீட்டுக்கு புறப்பட்டார்.

அல்மேல் மெயின் ரோட்டில் வரும் போது பிரதீப்பை மர்மநபர்கள் சிலர் வழிமறித்தனர். பின்னர் அந்த மர்மநபர்கள் தாங்கள் மறைத்து வைத்திருந்த ஆயுதங்களால் பிரதீப்பை சரமாரியாக தாக்கினார்கள். சாலையோரம் கிடந்த கற்களை எடுத்தும் அவரை மர்மநபர்கள் தாக்கினார்கள். இதில் பலத்த காயம் அடைந்த அவர் ரத்த வெள்ளத்தில் சம்பவ இடத்திலேயே பரிதாபமாக உயிர் இழந்தார். உடனே அங்கிருந்து மர்மநபர்கள் ஓடிவிட்டனர்.

இதுபற்றி தகவல் அறிந்ததும் அல்மேல் போலீசார் விரைந்து வந்து பிரதீப் உடலை கைப்பற்றி விசாரித்தனர். கடந்த 2011-ம் ஆண்டு நடந்த ஒரு கொலை வழக்கில் பிரதீப்புக்கு தொடர்பு இருந்தது. இந்த வழக்கில் பிரதீப்பை கொலை செய்ய திட்டமிட்ட நபர்கள், கடந்த 2013-ம் ஆண்டு அவரை துப்பாக்கியால் சுட்டு இருந்தனர். இதில், படுகாயம் அடைந்த பிரதீப் அதிர்ஷ்டவசமாக உயிர் தப்பித்து இருந்தார். இதனால் 2011-ம் ஆண்டு நடந்த கொலை வழக்கின் முன்விரோதம் காரணமாக பிரதீப் கொலை செய்யப்பட்டு இருக்கலாம் என்று போலீசார் சந்தேகிக்கின்றனர்.

பிரதீப்பை தீர்த்து கட்டிய கொலையாளிகள் பற்றிய முக்கிய துப்பு கிடைத்திருப்பதாகவும், கூடிய விரைவில் கைது செய்யப்படுவார்கள் என்றும் போலீஸ் அதிகாரிகள் தெரிவித்துள்ளனர். இதுகுறித்து அல்மேல் போலீசார் வழக்குப்பதிவு செய்து விசாரணை நடத்தி வருகிறார்கள். மேலும் தலைமறைவாகி விட்ட மர்மநபர்களை போலீசார் வலைவீசி தேடிவருகின்றனர்.